Le Sens MORAL.
CEtte Fable sert bien d' Exemple à ces Artificieux qui conuersent parmy les hommes, pour leur apprendre que toutes les ruses ont leur contreruse, et qu' il est mal aisé de faire profession de dupper tout le monde sans estre duppè de quelqu' vn, ce qui est certes vne chose honteuse aux maistres de ce mestier, Ils ont beau recourir au mensonge pour ne point rendre suspecte leur mauuaise volonté; Mais, si faut il, en sin qu' elle se descouure, car elle ne peut long temps estre cachè non plus que la fausse monnoye qui est vne des plus grandes tromperies du monde; Le Temps, qui ne peut rien tenir caché, fait vne monstre pub∣lique de cette engeance de mocqueurs, lors qu' ils y pensent le moins, et les expose comme ils meritent à la risé du tout le monde, car la Fraude tombe d'ordinaire sur son Autheur; Les sentiers destournéez par ou les trompeurs se croyent sauuer, les conduisent insensiblement en des precipices, Ce qui monstre assez, que c' est vne chose tout à fait indigne d'vne bonne Ame, d'vser de deguisement en ces matieres, si ce n' est d'auanture que l'on y soit convié par les Fourberies, et les artifices d'autruy.