¶Howe syr Loys of Xancere wente to se the erle of Foize at Ortays / and howe before the duke of Lancastre at Burdeaux / there were dedes of ar∣mes done bytwene fyue frenchmen and fyue englysshe men / and howe the duches of Lancastre wente with her doughter in to Castyle to kynge Iohan. Cap. C.liiii. (Book 154)
IN this seasō sir Loys of Xancer marshall of Fraūce was in Languedoc / in the marches of Tholouse and Carcassone / and he knewe well of the treatye that was made bytwene the duke of Berrey and therle of Foiz / for the maryage of the duke of Bowlonges doughter / whome the duke of Berrey wolde haue / though the damo¦sell were right yonge. Than the marshall had affection to go & se the erle of Foyz / as I was enfourmed by his men at Ortays / for whan he came thyder he founde me there. He came at the sendynge of the frenche kynge / and I shall shewe you why & wherfore. The frenche kyng was as thā yonge and had desyre to trauayle / and he had neuer ben as than in Languedoc / whiche is a great countrey / and full of cyties / townes and casteles and as than nygh all dy∣stroyed and wasted / for the duke of Berry and his counsayle / who had the gouernaūce of that countrey / had greatly enpouerysshed and pyl¦led the countrey / by tayles and great oppressy¦ons / the complayntes wherof came to the kyn∣ges eares / by reason that he was newly entred in to the domynacion of his Realme. And the kynge sayde he wolde go in to Languedoc to vysite that countrey / and also to go and se the pope whome he had neuer sene before / and al∣so in that voyage he sayd he wolde se the erle of Foiz / of whome he had herde so moche honour and larges spokē of. Thus the marshall went forthe on his waye / and departed fro the cytie of Tholous / with a fyue hundred horse / and rode so longe yt he came to Tarbe in Bygore / and fro thence to Morloys in Bierne. And the erle of Foiz who was signyfied of his comyng was ioyfull / and cōmaunded all his offycers that the towne of Ortays shulde be well apa∣relled to receyue him / for he sayd the marshals comynge pleased hym ryght well. lodgynges for his men were made redy / and the erle rode out in to the feldes to mete with hym / and mo¦than thre hundred horses / and there receyued hym with good chere. And he was at Ortays a syre dayes / and the marshall sayd to the erle / howe the frenche kynge had great affection to se the countrey of Languedoc / and to se hym. Than the erle aunswered and sayd. Syr / the kynge shall be ryght welcome / and gladde I wolde be to se hym. yea / but sir quod the mar∣shall / it is the kynges entension at his comyng playnely to knowe / whether ye wyll holde you frenche or englissh / for alwayes ye haue dissy∣muled out the warre / for ye wolde neuer arme you for no desyre. A sir quod the erle I thanke you / in that ye haue shewed me somoche / For syr / though I wolde neuer arme me / nor take no parte / there hath been good cause why. As for the warre bytwene Englande and Fraūce / I haue nothynge to do therwith / I holde my countrey of Bierne of no man / but of good and the sworde. What haue I to do to put my selfe in seruytude or in dyspleasure of one kynge or other / yet I knowe well myne aduersaryes of Armynake haue done that in them is to bring me in the indyngnacion of bothe partyes / for or the prince of Wales wente in to Spayne by the informacyon of the erle of Armynake / the prince wolde haue made me warre / he was so sore moued therto / that he had done so / and sir