It shalbe couthe in euery mans syght,
Out declared the great difference,
Atwene thy feblenes & my great excellence.
Than to represse thy surquedy at ones,
Cruel Orchus the tydogye infernall,
Shall rende thy skinne asunder frō the bones
To shew my power whiche is imperiall:
And to declare in especiall
Pouerte reclaymed vnto prydes lure,
With me to plete may no whyle endure.
And sodenly or glad pouerte toke hede,
Fortune proudly first began tassayle,
And vnwarely hent her by the hede,
Demyng of pride yt she may nat fayle,
Thrugh her power to vēquish this bataile:
But it may fall, a dwerye in his right,
To outray a gyaunt for all his gret might.
God taketh none hede to power nor strēgth,
To highe estate, nor to high noblesse,
To square limes forged on brede or length,
But to quarels groūded on right wisnesse:
For out of wronge may growd no prowesse,
For where that trouth holdeth champarty,
God wyll his cause by grace magnify.
Wherfore pouerte stronge in her entent,
Light, and delyuer, voyde of all fatnesse,
Right well brethed, & nothing corpulent,
Small of dyette, surfettes to represse,
Agayne fortune proudly gan her dresse:
And with an vgly sterne cruell face,
Gan in armes her proudly to enbrace.
Pouert was slender & might well endure,
Fortune was roūde, short of wynde, & breth:
And wombes great oppressed with armure,
For lacke of wynde the great stuffe thē sleth,
And many a man bringeth to his dethe:
For ouermoche of any maner thing,
Hath many one brought to his vndoyng.
A meane is best with good gouernaūce,
To moche is nought, nor ouer great plente,
Gretter rychesse is founde in suffysaunce,
Than in the flodes of superfluyte:
And who is content in his pouerte,
And grutcheth nat for bytter nor for sote,
What euer he be hath fortune vnder fote,
Couetyse put hym in no dispayre,
Wherfore pouerte in herte glad and lyght,
Lyft fortune full hygh vp in the eyre,
And her constrayned of very force & myght:
For glad pouerte of custome and of right,
Whan any trouble agayne her dothe begyn,
Aye of Fortune the laurer she dothe wyn.
Maugre Fortune in the eyre a lofte,
Constrayned she was by wylfull pouerte,
That to the earthe her fall was full vnsofte:
For of pouert the bony sharpe kne,
Slendre, and longe, & leane vpon to se
Hyt fortune with so great a myght,
Agayne ye hert, she myght nat stand vpryght.
To signify that pouerte with gladnesse,
Which is content with small possession,
And geuyth no force of treasour nor richesse,
Hath ouer fortune the dominacion,
And kepeth her euer vnder subiection:
Where worldly folke wt their rych aparaile,
Lyue euer in dred lest fortune wolde fayle.
The poore man afore the thefe dothe synge,
Vnder ye wodes with fresh notes shryll,
The ryche man full fearfull of robbyng
Quakyng for drede rydeth forthe full styll:
The poore at large goth wher he list at wyll,
Strongly fraūchysed frō all debate & stryfe,
The ryche aferde alway to lose his lyfe.
Thus glad pouerte hath the palme ywonne,
Fortune outrayed for all her doublenesse,
Vpon whome pouerte in haste is ronne,
And strayned her wyth so great duresse,
Tyll she confessed & playnly dyd expresse,
with faythe & hande in all her great payne,
To abyde what lawe pouerte lyst ordayne.
And in haste after this discomfyture,
Fortune began to complayne sore,
But glad pouert which al thing might indure
Charged fortune scorne her no more:
For it was sayd sythe go full yore,
He that reioyseth to scorne folke in vayne,
Whan he is lothest, shall scorned be agayne.
Yet quoth pouert though thou were dispitous
Wordes rehersyng whyche were nat fayre,
Straunge rebukes full contrarious,
And repreues many thousande payre,
Thou shalt me fynde againe warde debonaire:
For though a tong be slaundrous & vēgeable,
To slaunder againe, is nothing cōmendable.