This to meane ye shal your selfe ieoparte
As hardy knightes proudly to prouide,
Within the felde asondre nat departe,
But kepe close and for no drede deuide,
Desyre of worshyp make to be your gyde,
Your expert noblesse eternally to auaunce,
By quicke reporte of newe remembraunce.
And haue thys day nothyng in memory
Nother your ryches, blode, ne your kinrede,
Saue only hope and good trust of victory,
And hardi prowesse you to conducte and lede:
And thinke knightli what shalbe your mede
With marcial palmes your renome & name,
In the highest place set in the house of fame.
And though ye be but a fewe in nombre
Let in your hertes one thyng be fantasyed,
While diuision do the you nat encombre
Victory in armes may you nat be denied:
For nothyng is to conquest more applied,
Than true accord amōg your self to shew,
Though you in nombre be but verey few.
But by this counsayle syngulerly notable,
And by this knightes kingly good langage,
They recomforted held them selfe able
Agayne their fomen to hold their passage:
And fyrst of al of hertelye proude corage,
The Perciens more mortally to greue,
Within their tentes, they fyll on them at eue.
They of Perce ydrowned were with wyne,
This to say, through their great excesse,
They lay and slept lyke as dronkenswyne,
Their watche nat kept: lo how y• drōkēnesse
Causeth oft of very rechelesnesse,
Ful many a man that wyl nat take kepe,
For to be murdred a nightes whan thei slepe
And as this kyng dyd his knyghtes lede,
The Perciens tentes assayling sodaynlye,
Or they were ware or toke any hede
Them for to affray they made an hidous cri:
Defence was none vpon their party,
For men may knowe by olde experyence,
In folkes dronke may be no resistence.
Out of nombre they slough of their fone,
And ceased nat of all the longe nyght,
Tyll on the morowe that the sonne shone,
That to beholde it was an vgly syght:
And proude Xerxses put anone to flyght,
Euer the last that wold his fone assayle,
And aye the first that fledde in batayle.
In his flight so fast away he ran,
For therin was holy all his trust,
And of great trauayle anon this Xerxes gan
Of coward drede, to haue so great a thurste,
So dry he was of salte, sond, and dust,
And by the way serching ferre and nere,
He nother founde wel ne riuere.
Of auenture amyery ground he fand,
The water troubled, and blody of colour,
And Xerxses there drāke water wt his hande
Him to refresh in his deedly labour:
And as he thought he neuer dranke lycour
To him more holsom, so strayt stode the case,
Confecte with spices, pyment, nor ypocras.
This was the first mischefe and the drede
In which Xerxes the mighti prince stode,
Here men may se such as lyst take hede
Howe gery fortune furyous and wode,
Wil not spare for riches nor for goode,
Mighty princes which lyst not God to know,
From their estates to bring them ful lowe,
O hatefull serpent of hygh presumpcion,
Aye vnstable with gredy vsurpyng,
By newe trouble of false sedicion,
Which lyst of pryde receiue no warnyng,
For nowe Xerxses of Perce & Mede kyng,
Purposed hath with odyous apparaile,
The temple of gods contagiously tassayle.
For as him thought it myght nat suffise
To great example of his contrarious pryde,
Howe here toforne god did him chastyse
By mannes hande, to set his pompe asyde:
But nowe of newe he gan agayne prouyde
By sacrylege his mighty hand to dresse,
To spoyle Appollo, & reue hym his richesse.
There was in Delos a temple thylke day,
Moste stately builded and set vp by masons
Great ymages, relyques, and ryche aray,
Of golde and stones in sondry mansyons:
And there Appollo to sondry questyous
Yaue redy answere, the story telleth thus,
And he was called Appollo Delphicus.
Four thousand men Xerxses thyder sent
By his auice chose out for the nones,
Ful clenly armed, and as they thether went
To spoyle the temple of gold and rich stones,