And on the chylde whych that stode besyde
The stroke a lyght, and or he dyd auerte
The speres heade rofe hym through the hert.
But of this chylde whan y• deth was couth,
Tolde and reported holy the manere,
How he was slayne in hys tendre youth,
Borne to be heire vnto his father dere,
Cresus for sorow chaunged loke & chere:
And for constraint of dole in his vysage,
He resembled a very deade ymage.
But euery sorowe by long continuaunce
At the last it sumwhat must aswage,
For ther is none so furious greuance
Nor so mortal importable rage,
But long processe yeueth him auantage:
I meane thus, there is none so great a sorow,
But it mought cese outher eue or morowe.
Philosophers concluden and discerne
And by their reasons recorden by scripture,
Thyng vyolent may not be eterne,
Not in one poynt abydeth none auenture,
Nor a sorowe may not alwaye endure:
For stoūdemele through fortunes variaunce,
There foloweth ioy after great greuaunce.
The sorow of Cresus tho it were intollerable
And at his hert the greuaunce sate so sore,
Syth that his dole was irrecuperable,
And meane was none his harmes to restore,
Bochas writeth of his wo nomore:
But of his fal howe he fyll in dede,
To tel the maner forth he doth procede.
And for a whyle he set his style asyde,
And his processe in party he forbare,
To speke of Cresus that was kyng of Lyde
And gan resort to write of Balthasar:
Agayne rehersynge or that he was ware,
Howe myghty Cirus of woful auenture
Made on hym proudly a discomfiture,
And as it is put in remembraunce
Of Balthasar to holde vp the party,
Cresus wyth hym had made an aliaunce,
With al his puissaunce & al his chyualry:
His lyfe, his treasoure, to put in ieoparty,
Sworne in armes as brother vnto brother,
By Cirus vēquyshed the one after the other
Both their mischefe no lenger was delayed,
Al be that Cresus faught long in hys defence,
He finally by Cyrus was outrayed,
And depriued by knyghtly vyolence,
Take in the felde there was no resistence,
And rigorouslye to his confusion,
With myghty fetters cast in darke prison.
And more to encrease his gret aduersite,
A sonne of his tendre & yong of age,
That was dumbe from his natiuite,
And neuer spake word in no maner lāgage,
Cyrus commaunding by furious outrage
That Cresus shoulde by vengeable cruelte,
By a knyght of Perce in prison headed be,
And with his sworde as he gan manace,
Cresus to haue slayne wythout al reuerence,
The dombe chylde there present in the place
Which neuer had spoken, thus said in audiēce:
Withdrawe thy stroke, & do no violence,
Vnto my lorde thy fame so to confounde,
To slee a kyng that lyeth in prison bound.
The knight astonied hath his stroke forborne
Gretly abashed in that darke habitacle,
Whych herde a chyld that neuer spake toforne
Agaynst his swerde to make au obstacle,
Ran and tolde this marueylous myracle
To myghty Cirus, with euery circūstaūce,
Hopyng therby to atempre his greuaūce.
But where as tyrauntes be set on cruelte,
Their croked malice ful harde is to appese:
So indurate is their iniquite
That al in vengeaunce is set their hertes ese,
Them selfe reioysinge to se folke in disease,
Lyke as they were in their frowarde daūger,
Clerely fraunchised fro god & his power.
Thys cruel Cirus most vengeable of desire,
To execute his fel entent in dede,
Let make in haste of fagottes a gret fyre,
And gan thē kyndle wyth many coles rede,
And made Cresus quakyng in his drede,
For to be take where as he lay ful lowe,
And bad men should in to the fyre him throw.
But Iupiter whych hath his vengeaūce seyn,
Howe cruel Cirus with malice was attaynt,
From heauen sent a tempest and a reine,
That sodainely y• horrible fire was quaynt:
Woful Cresus wt dredful fyre made faynt,
Escaped is his furious mortall payne,
God and fortune for hym lyst so ordayne.