Here foloweth of precyous stones and of their vertue whiche growe in ynde capitulo ¶vijo
IN ynde groweth the Admont stone / whiche is a stone charged with many grete vertues / She by her nature draweth to her yron and maketh it to cleue to it so fast / that it may vnneth be taken fro it for the vertue that is in it / The dyamont groweth also in ynde alle hool / and it may not be broken in pieces ne vsed / but it be by the vertue of the blood of a ghoot alle hoot / yet growe there other stones of many dyuerse facions and vertues / the whiche ben of moche noble recomendacion renōm•••• and of moche fayr vertue / and first I shal speke of the Eme∣rawde whiche is so playsaunt to the eye / that it recon∣forteth alle the sight of hym that beholdeth it / In lyke wyse groweth in ynde an other stone the whiche is callyd Carboncle / the whiche by nyght or yf it be in derke place and obscure / it shyneth as a cole brennyng / Also ther growe Saphyres whyche by theyr vertue take away the swellyng and redenes of the eyen / Ther groweth also a stone callyd Topace whiche is of colour lyke vnto fyn golde and also is of hye vertue / yet also ther growe there Rubyes / whiche is a stone moche preysed & loued emong the peple / and is also of right more grete valewre and