[illustration] Wherfor god made and crea∣ted the world / capitulo ¶ijo
GOd made and created all the world of his only wylle by cause that he myght haue somme thynge that myght besuche / as myght deserue of his weel & goodnes yf it were not in his defaulte And therfore he establisshid this worlde / Nothynge for that he shold be the better / ne that he had ony nede / But he dyde it for charyte & by his grete debonarete / ffor as right charitable / he wolde that other shold parte with hym of his weel & goodnes / And that alle other creatures euerich after his nature sholde fele of his puissance after that it myght apperteyne to hym / Thus wold god establisshe this world / that suche thinge shold yssue that myght vnderstande & knowe the noblesse of his power and of his sapyence / and also of the good that he made for the man erthely / that he myght serue hym in suche maner / that by hym he myght deserue the grete weel & good that he had made for hym / Thenne ought we aboue alle other thynge to loue hym & thanke