Ecclesiastes Solomonis Auctore Joan. Viviano. Canticum Solomonis: nec non Epigrammata sacra, per Ja. Duportum. Accedunt Georgii Herberti Musæ responsoriæ ad Andreæ Melvini Anti-tami-cami-categoriam.

CAP. VIII.

1

O Si frater utì meus fuisses, Meae qui ubera lactuit parentis! Tum te, mellile mi, deoscularer Extra repperiens, vel absque probro, Ut nequis malus invidere possit Jucundas mihi basiationes.

2

Tibi me comitem darem, meaeque In conclavia ducerem parentis, Quae me consiliis suis juvaret; Fragrantem tibi murrhinam propinans. Miscerem in pateris aromatiten, Malorum latices Apyrinorum:

3

Laeva ejus capiti meo subesset, Me circundaret illiúsque dextra.

4

Oro vos ego, feminae Sionis, Ut nè, delicias meas, amicum Excusso malè palpebris sopore Priùs quàm velit ipse suscitetis.

5

Quaenam haec egregiae puella formae, Eremo egrediens, amasiíque Innitens gremio•• sui? sub umbra Mali te arboris ipse suscitavi:

Enixa est ibi te parens; ibíque Est experta puerperî dolores.

6

Cordi me adde tuo, velut sigillum, Ut signacula brachio tuóque. Fortis nempe amor est, potens cupido, Nec mors fortior est, potentiórve; Nec vis est minor aemulationis, Ipsum quâ ne{que} durius sepulcrum:•• Candentes alit igneás{que} prunas, Suo pectore suggerente flammas.

7

Nullo diluvio potest aquarum, Nullis viribus ingruentis undae Restingui vehemens amoris ardor. Venalem cave ne putes amorem; Si cunctas dederis opes, ut illum Lucrari poteris, nihil valebis, Cónscisces tibi probra, non amorem.

8

Habemus quoque parvulam sororem; Est germana, sed (ô pudor!) vel illa Quavis pejor Amazone, absque mammis; Est nobis tamen: & quid huic sorori, Ejus quando aderit dies, agemus?

9

Murus si fuerit, palatium illi Argento è nitido superstruemus; Quòd si janua, muniemus illam Ornantes tabulis, cedróque pulchrâ.

10

Murus certè ego sum, meaeque mammae Ceu turres: favor hinc, amórque nobis; Coepi & charior esse, gratiórque.

11

Inter pinguia Balamonis arva Vineam Solomon habebat olim; Et custodibus elocabat illam, Paciscens pretium annuos ob usus, Mille ut penderet ergò quisque nummos.

12

Coram me mea vinea; indè mille Debentur, Solomon, tibi quotannis,

Et custodibus illius ducenti.

13

At ô quae incolis hortulos amoenos, Attendant tibi cùm tuae sodales, Mellitàmque tuam hauriant loqelam, Vocem audire tuam & mihi licebit?

14

Festines precor, advoles, amice, Velox ut caprea, hinnulúsve, odora Transcurrens juga, aromatúmque montes.

FINIS.