Ecclesiastes Solomonis Auctore Joan. Viviano. Canticum Solomonis: nec non Epigrammata sacra, per Ja. Duportum. Accedunt Georgii Herberti Musæ responsoriæ ad Andreæ Melvini Anti-tami-cami-categoriam.

In auspicatissimam Regis CAROLI II In∣augurationem festo die S. Georgii celebratam.

O Fortunatos gemino Polluce Britannos! Faustum sidus utrunque, Georgius unus, et alter, Angligenis; unus (nisi fallit fabula) Martyr Pro Christo, Carolo pro Martyre Georgius alter, Martyris et nato; fidei Confessor avitae, Et scelerum vindex, populi et ••utela Britanni. Qui cunctando hostem fregit ter Maximus heros, Et rem restituit nobis, solióque paterno Restituit Carolum Fabiano more secundum. Bini igitur Sancti festo celebrentur eodem,

Aut etiam alterius nova sint Solennia Georgî; Atque eodem Aprili peragantur mense; Britannis Cùm primùm affulsit nova spes duce et auspice Monke Venturi Caroli, redivivi et gloria regni. Cùmque suis Regem latebris servaverit Arbor, Sit celebre hoc nostrae posthac emblema salutis: Póstque Crucem Christi, nostrae quae insignia gentis, Planta beata Anglis sit proxima Regia Quercus, Aeternùm et nostris indat sua nomina Fastis. Et nè unus tantùm Satrapis sit nobilis Ordo, Sit Titulus novus alter, et alter qui vehat Ordo Delectos heroas ad aethera, nè vel honores Sola suos, Equitésve Periscelis aurea jactet; Sit novus Ordo, Sacra qui nomen ab Arbore sumat: Alter erit sic Sanctus, erunt etiam altera festa, Atque suos Equites nunc aurea Querous habebit.