Page 402
HYPOTHESES.
Hypoth. I.
Causas rerum naturalium non plures admitti debere, quàm quae & vera sint & earum Phaenomenis explicandis sufficiunt.
Natura enim simplex est & rerum causis superfluis non luxuriat.
Hypoth II.
Ideoque effectuum naturalium ejusdem generis eaedem sunt causae.
Uti respirationis in Homine & in Bestia; descensûs lapidum in Europa & in America; Lucis in Igne culinari & in Sole; reflexionis lucis in Terra & in Planetis.
Hypoth. III.
Corpus omne in alterius cujuscunque generis corpus transformari posse, & qualitatum gradus omnes intermedios successivè in∣duere.
Hypoth. IV.
Centrum Systematis Mundani quiescere.
Hoc ab omnibus concessum est, dum aliqui Terram alii Solem in centro quiescere contendant.
Hypoth. V.
Planetas circumjoviales, radiis ad centrum Iovis ductis, areas describere temporibus proportionales, eorumque tempora periodica esse in ratione ses quialtera distantiarum ab ipsius centro.
Constat ex observationibus Astronomicis. Orbes horum Pla∣netarum non differunt sensibiliter à circulis Jovi concentricis, & motus eorum in his circulis uniformes deprehenduntur. Tempo∣ra verò periodica esse in ratione sesquialtera semidiametrorum or∣bium consentiunt Astronomici: & Flamstedius, qui omnia Mi∣crometro & per Eclipses Satellitum accuratius definivit, literis ad me datis, quinetiam numeris suis mecum communicatis, significavit rationem illam sesquialteram tam accurateè obtinere, quàm sit pos∣sibile sensu deprehendere. Id quod ex Tabula sequente manife∣stum est.