Prop. LXVI. Theor. XXVI.
Si corpora tria, quorum vires decrescunt in duplicata ratione distan∣tiarum, se mutuo trahant, & attractiones acceleratrices binorum quorumcun{que} in tertium sint inter se reciproce ut quadrata distan∣tiarum; minora autem circa maximum in plano communi revolvan∣tur: Dico quod interius circa intimum & maximum, radiis ad ipsum ductis, describet areas temporibus magis proportionales, & figuram ad formam Ellipseos umbilicum in concursu radiorum ha∣bentis magis accedentem, si corpus maximum his attractionibus agitetur, quam si maximum illud vel a minoribus non attractum quiescat, vel multo minus vel multo magis attractum aut multo minus aut multo magis agitetur.
Liquet fere ex demonstratione Corollarii secundi Propositio∣nis praecedentis; sed argumento magis distincto & latius cogente sic evincitur.
Cas. 1. Revolvantur corpora minora P & Q in eodem plano circa maximum S, quorum P describat orbem interiorem PAB, & Q exteriorem QE. Sit QK mediocris distantia corporum P & Q; & corporis P versus Q attractio acceleratrix in mediocri illa distantia exponatur per eandem. In duplicata ratione QK