Page [unnumbered]
Effare, Marmor iners; Dic, Cujus Cinis? Salvis modestissimi Viri Manibus, IOSEPHUS heîc MEDUS jacet, S. T. B.
Collegii Christi apud Cantabrigienses Socius, Ipse Musarum Hospitium solenniorum, & Iusta in Collegio Vniversitas; Qui Omnes Linguas calluit, Artes excoluit, Philosophiae & Mathematicae adjungens Quicquid AEgyptii occultârunt, aut invenerunt Chaldaei; Chronologiam insuper, ac Historiam, omniúmque Reginam Theologiam:
Quarum praelucente face, Induit se in abditissimos Prophetiarum recessus, & Speluncâ Apocalypticâ exuit Romanam Belluam; Confligendi cum Difficultatibus avidissimus, Mysteriorum Interpres felicissimus; Ut in IOSEPHO hoc nostro Facilè agnovisset Gens Hieroglyphica Zaphnath Paaneah redivivum.
Hic Nullis addictus partibus, omnibus, aequus fuit, Veritatis ac Pacis amans; Benignus aliis, Amicis totus patens; Verbis, Voto, Vitâ, sanctus, castus, humillimus.
Ast Imminentis tunc Ecclesiae & Reipublicae Tempestatis Mens, Prophetis contubernalis, praesaga Coelestem portum occupavit Anno post natam Salutem MDCXXXVIII. AEtatis Suae LII.