Paroimiographia Proverbs, or, Old sayed savves & adages in English (or the Saxon toung), Italian, French, and Spanish, whereunto the British for their great antiquity and weight are added ... / collected by J.H., Esqr.

LETTRE COMPOSEE DE PROVERBES, Lesquels vont tres-tous, Enchainez a un sens congru, envoyée a un Gentilhomme, Qui se mettoit en train pour aller en France.

MONSIEUR,

APres avoir jettè l'oeil sur la presente qui va toute farcie de Proverbes, de Dictons, & de vieux Quolibets, dont quelques uns s'usoient du temps de hauts bonnets quand on muchoit a la manche, vous direz, par avanture, que l'Autheur ayt quelques tintouins, ou grillons en la teste, qu'il ait de sable Mouvant, ou du Mercure, ou plustost un quartier de la Lune en la cervelle; Mais Vous qui avez la cabo che si bien timbrée en passerez un autre jugement.

Le bruit court, que vous avez dessein de voyager, & tracasser le monde pour quelque temps, & particulierement de faire, le tour de France, sil vous estes fichè en telle re∣solution permettez un vieux routier qui est madrè es affaires du monde ayant pisse en beaucoup de neiges, qui sçait bien son entregent, & plus que son pain manger, de vous donner un mot d' advis touchant le Genie de ce pays là.

Quant a la conversation, vous y trouverez des gens y gens; vous y trouverez autant de testes, tant de sentimens, & plus souvent en France qu'en aucun' autre Region, ou la plus part du peuple semble avoir mangè de la biche blanche, ou de la vache enragee, Estant impatient de la paix, jus∣ques à tant qu'l ait reparè les bresches de la guerre; Mais par tout, il faut prendre les gens comm' elles sont, & le temps comm' il est: sur tout observez ces trois monosyllabes, Oy, voy, & tais si tu veux vivre en paix, car il vaut mieux glisser du pied que de la Langue, & l'Espagnol vous dit, En bouche serrée les mouches n'y entrent pas: soubs ce bovillant Climat vous rencontrerez quel∣ques fois de bravàches, de mangeurs de charrettes ferrées, qui faisans le Roland portent mine de tuer six de la chandelle, & saize avec le chandelier; Ils vous feront accroire que vesses sont Lan∣ternes, & les estoilles papillotes; soyez moderè, & discret parmi telles gens, mais nullement craintif, & lasche, poutce que celuy qui se fait brebis le loup le mange; Et le peuple voysin qui boutonne le pourpoint du bas en haut, vous dirà, que les François a la premiere bouffee sont plus qu'hommes, mais depuis moins que femmes.

Vous y trouverez mesmement de Je unes desbauches qui mangent leur bled en herbe, & bruslent la chandelle par les doux bouts, Il vont coiffez en l'opinion qu'on ne sçauroit estre gentilhomme parfa't sans avoir fait cinq voyages en Süerie, car en France (comme part tout) a la quenoville le plus f••rt s'agenouille; Gardez vous bien des camerades de ceste calibie là; Ce neantmoins trai∣tez les debonnairement, car, Belles paroles n'ecorchent par la Langue; En tout cas ne prestez pas vostre argent, car au prester cousin-germain, au rendre fils de put••in, Et vous y trouverez aussy (comm'en en Angleterre) Qui preste a l'amy perd au double: Ce neantmoius, A celuy qui a son paste au four, on pourrà bien prester un torteau.

Outre tout cecy, donnez vous garde de ne vous opiniatrer, & debatre des matieres de la Religion, mais laissez le Monstier on il est, pource que par trop debattre la veritè se perd, especiallemen es points de la Foy, vous y trouverex assez de gens de ceste farine là, qui seront prompts a sauter du coq a l'asne, & de treille en paisleux.

Le pays, & le peuple de France sont addonnez a toutes sortes de gaillardises, & divertissements, vous y trouverez des bons garcons, des Rogiers de bons temps, qui seront joyeux comm' Esmeril∣lons, ou rats en paille; Vous ne deuriez pas estre d'un humeur si Saturnin, & sombre, que de ne jovialìzer par fois avec eux, & avec le bon vin chasser le soin & le chagrin, Car un' once d'alegresse vaut cens livres de melancolie; s'il vous y avez envie d'entretenir un Laquay, vous y en trouverez a foison; mais gardez bien de n'en choisir un qui est trop officieux, car c'est un valet du diable qui faict plus qu'on ne luy commande.

Quant a la santè, & les reiglements pour la diete, qui est la chose plus principale, car qui n'a santè n'a rien, vous ferez bien en ce pays vineux de marier la cave, & le puits; Toutes fois a morceau restif esperon de bon vin; mais le vin bois comme Roy, & l'eau comme taureau; Au matin bois le vin blanc, le rouge an soir; pour faire bon sang, observez aussy, qu'apres la poire ou le vin, ou le prestre; on dit que Boeuf salè faict trouver le vin sans chandelle; Ajoustez a cecy que si tu veux engraisser promptement, mangez avec faim, bois a loisir, & lentement.

Touchant les mangeailles, salade bien lavée, & salée, peu de vinaigre, & bien huylée; Des potirons, ou champignons les meilleurs ne valent rien; Faim faict dinner, & passetemps souper; veau mal cuit, & poulets cruds font cimitieres bossus; Cest un repas pour le Diable ou il n'y a point du sel; Fourmage est sain qui vient de chiche main; Des femmes, & des poissons le milieu est le meilleur; Un oeuf n'est rien, deux font gran bien, trois c'est assez, quatre c'est tort, cinq c'est la mort.

Touchant l exercice, pourmenez jusques a tant que la sang paroisse es ioües, non pas que la sueur roupie de nez; Au matin vers les monts, au soir vers les fonts; Quant au sommeil, & le repos de nuit, il y a un 'observation, que six heures dort l'ecolier, sept le Voyager, huit le Vigneron, & neuf, en demande le Poltron; Il y a un'autre Regle, que lever a six, manger a dix, souper a six, coucher a dix, font viure l'homme dix fois dix: En conclusion, tenez chauds les pieds, & la teste, au demeurant vivez en beste.

Touchant les occurrences du temps il y en a diverses sortes de relations, mais ce'st ne'st pas E∣vangile, tout ce qu'on dit par la ville, mais on le dit pour chose asseurée que Dunquerque (ce nid d'Harpyes) commence a Parlementer, & vous sçavez, que la Ville qui parle, & la fille qu' es∣coute, l'un se rend, l'autre se fou—A bon entendeur, ne faut que demy mot.

Ce'st tout ce que j'ay a vous dire pour le present, pource is veux couper le fil de mon dire, car courtes folies sont les meilleures, en vous priant de ne prendre pas en mauvaise part ces drolleries, pource qu'elles procedent de vostre ancien serviteur, & amy, & il n'y a meilleur miroir que le vieil amy; Durant vostre absence, s'il y a aucune chose imaginable, en quoy vous vous puissiez servir de moy, j'employeray verd, & sec, je mettray tous mes cinq sens pour vous rendre obeissance, car je suis du fin fond de mon coeur

Le vostre I. H.