Tabula

¶Of y^e meruayls & wondres of wales ca .xx.

THere is a pole at Brechnok Therin of fyssh is many aflok Oft he chaungeth his hewe on cop And bereth aboue a gardyn crop Oft tyme howe it be Shape of hous there shalt thou se Whan the pole is frore it is wonder Of the noyse that is ther vnder Yf the prynce of the londe hote Byrdes synge well mery note As merily as they can And syngyn for none other man Besydes Caerleon Two myle fro the town Is a roche well bryght of leem Ryght ayenst the sonne beem Goldclyf that roche hyght For it shyneth as god full bryght Suche a flour in stoon is nought Without fruyt yf it were sought If men coude by craft vndo The vaynes of therth and come therto Many benytece of kynde Ben nowe hyd fro man••••es ••••ynde And ben vnknowe yet. For defaute of mannes wytte Grete tresour is hyd in grounde And after this it shall be founde By grete studye and besynes Of hem that comen after vs That olde men had by gr••te nede We haue by besy dede ¶Treuisa. In bokes ye may rede That kynde fayleth not at nede Whan noman had crafte in mynde Then of craft halpe god and kynde. Whan no techer was in londe Men of craft by goddes honde They that had craft so thenne Taught forth craft to other men Some craft that yet come not in place. Some man shall haue by gods grace ¶R. An ylonde is with noyse & stryfe. In west wales at Kerdyf Faste by Seuarne stronde Barry hyght that ylonde In that hyther syde in a chen•• Shalt thou here wonder dene And dyuerse noys also Yf thou put thyn cere to Noys of leues and of wynde Noys of metals thou shalt fynde Frotynge of yren & westones y^• shalt here Hetynge of ouens then with fyre All this may well be By wawes of the see That breketh in thare With suche noys and fare At Pendrok in a stede Feudes do oft quede And throweth foule thynge inne And despyseth also synne Neyther craft ne bedes may Do thens that sorow away Whan if greueth soo To the men it bodeth woo At crucynar in west wales Is a wonder butyals Euery man that cometh it tose Semeth it euen as moche as he

Hoole wepen there a nyght Shall be broken er daye lyght At nemyn in north wales Alytell ylonde there is That is called bardysay Monkes dwell there alway Men lyue so longe in that hurst That the oldest deyeth fyrste Men saye that Merlyn there buryed is. That hyght also syluestris There were Merlyns tweyns And prophecyed beyne One heet Ambrose an Merlyn And was y goten by gobelyn In demicia at carmerthyn Vnder kynge Vortygeryn He tolde his prophecye Euen in snowdonye. Atte heed of the water of coneway In the syde of mount eryry Dynas embreys in walsshe. Ambrose hylle in Englysshe Kynge Vortygere sate on The watersyde and was fulle of wone. Then Ambrose Merlyn prophecyed. Tofore hym ryght the ¶Treuisa What wytte wolde wene That a fende myght gete a chylde Some men wolde mene That he may no suche werke welde That fende that goth a nyght Wymmen full ofte to gyle Incubus is named by ryght And gyleth men otherwhyle Succubus is that wyght God graunt vs none suche vyle Who that cometh in hyr gyle Wonder hap shall he smyle With wonder dede Bothe men and wymmen sede Fendes woll kepe With craft and brynge an hepe. So fendes wylde May make wymmen bere chylde Yet neuer in mynde Was chylde of fendes kynde For withoute eye Ther myght no suche chylde deye. Clergy maketh mynde Dethe sleeth no fendes kynde But deth slewe Merlyn Merlyn was ergo no gobelyn An other Merlyn of Albyn londe That nowe is named Scotdonde also And he has nemes two Siluestris and Calidonius also Of that woode Calidonie For there he tolde his prophecye And heet Syluestris as well For whan he was in batell And sawe aboue a grysly kynde. And fyll anone out of his mynde And made no more abood But ran anone vnto the wood ¶Treuisa. Siluestris is woode Other wylde of mode. Other elles That atte wood he dwelles ¶R. Siluestris Merlyn. Tolde prophecye well and fyn And prophecyed well sure Vnder kynge Arthure Openly and not so dose As Merlyn Ambrose There ben hylles in snowdonye That ben wonderly hye With hyght as grete a waye As a man may go adaye And heet eryry in walsshe Snowy hylles in Englysshe. In these hylles ther is Leese inough for all berstes of walys These hylles on top berrs Two grete fysshe weares Conteyned in that one ponde. Meueth with the wynde an ylonde. As though it dyd swymme. And neyheth to the krymme. So that herdes haue grete wonder. And wene y^• the worlde meueth vnder In that other is perche and fysshe Euery one eyed is So fareth all well In Albania the mylwell

In Rutlonde by Tetynwell Ther is a lytyll well That floweth not alwaye As the see twyes a daye But somtyme it is drye And somtyme full by the eye Ther is in North wallia In Mon that heet Anglesia A stone accordynge well nyght As it were a mannes thyghe Howe ferre euer that stone Be born of ony mon. On nyght it goth home his waye That he founde by assaye Hughe therto of Shrowesbury In tyme of the fyrste Harry For he wolde the sothe fynde That stone to an other he gan bynde. Wyth grete cheynes of yre•••• And threwe all I feren Ybounde at one hepe Into a water depe Yet amorowe that stone Was seen erly in Mon. A chorle helde hymselfe full slyghe. And bounde this stone to his thyghe. His thygh was roten or daye And the stone wente awaye. Yf men done lechery. Nyghe that stone by Swote cometh of that stone. But chylde cometh there none. There is a roche ryght wonderly. The rocht of herynge by contrey Though ther crye ony man born And blowe also with an horne Noyse there though thou abyde Thou shalte here none in this syde Ther is an other ylonde Fast by mon at honde Hermytes there ben ryue Yf ony of them done st••yue All the myse that may be gete Come and ete all theyr mete Thenne cesseth neuer that w•••• Tyll the stryfe cesse also As men in this londe Ben angry as in Irlonde So sayntes of this contreye Ben also wretchefull alwaye Also in this londe In Irlonde and in Scotlonde. Ven belles and staues That in worshyp men haues And ben worshyped so then Of clerkes and of lewde men. That dreden also To sweren on ony of tho. Staffe eyther belle As it were the gospelle At Basyng werke is a welle That Sacer heet as men telle. It sprengeth so sore as men may see What is caste in it throweth aye. Therof sprengeth a grete stronde It were inough for all that londe Seke at that place Haue both hele and grace In the welmes ofter shan ones Ben founde reed spercled stones In token of the blood reed That the mayd Wenefrede Shad at that pytte Whan hir throte was kytte He that dyd that dede Hath sorow on his sede His chyldren at all stoundes Berken as whelpes and houndes For to they praye that mayd grace Ryght at that welle place Eyther in Shrowesbnry strete There that mayd rested swete