Page [unnumbered]
¶Capitulum Octauum
THenne kynge Mark rode tyl he came to a fontayne / and there he rested hym / and stode in a doubte whether he wold ryde to Arthurs courte or none / or retorne a∣geyne to his countrey / And as he thus rested hym by that fon¦tayne / ther came by hym a knyght wel armed on horsbak / and be alyghte and teyed his hors vntyl a tree / and sette hym do∣une by the brynke of the fontayne / and there he made grete lā¦gour and dole / and made the dolefullest complaynte of loue / that euer man herd / and al this whyle was he not ware of ky∣nge Marke / And this was a grete parte of his complaynte / he cryed and wepte sayenge O fayre Quene of Orkeney ky∣nge Lots wyf and moder of sir Gawayne and to sire Gaheris and moder to many other / for thy loue I am in grete paynes / Thenne Kynge Marke arose and wente nere hym / and sayd / Fayr knyght ye haue made a pyteous complaynte / Truly sa∣id the knyght / hit is an honderd parte more reufullyr than my herte can vtter / I requyre you said Kyng Marke telle me yo∣ur name / Sir said he as for my name I wil not hyde it from no knyght that bereth a shelde / and my name is sire Lamorak de galys / But whan sire Lamorak herd Kynge Mark speke thenne wist he wel by his speche that he was a Cornysshe kny∣ght / Syr said sir Lamorak / I vnderstande by your tonge ye be of Cornewaile wherin there duelleth the shamefullest kynge that is now lyuynge / for he is a grete enemy to alle good kn∣yghtes / and that preueth wel / for he hath chaced oute of that Countrey syr Tristram that is the worshipfullest knyght that now is lyuynge / and alle knyghtes speken of hym worship / And for Ialousnes of his quene he hath chaced hym oute of his countrey / Hit is pyte said sir Lamorak that euer ony su∣che fals knyght coward as kynge Marke is shold be matched with suche a fayre lady and good as la Beale Isoud is / for alle the world of hym speketh shame / and of her worshyp that ony Quene maye haue ¶ I haue not adoo in this matere said kynge marke / neyther noughte wille I speke therof Wel said said syre Lamorak syre can ye