To the extent possible under law, the Text Creation Partnership has waived all copyright and related or neighboring rights to this keyboarded and encoded edition of the work described above, according to the terms of the CC0 1.0 Public Domain Dedication (http://creativecommons.org/publicdomain/zero/1.0/). This waiver does not extend to any page images or other supplementary files associated with this work, which may be protected by copyright or other license restrictions. Please go to http://www.textcreationpartnership.org/ for more information.
HEre begynneth the fyfthe daye / soo hit befelle that syre Palomydes came in the morne tyde / and profered to Iuste there as kynge Arthur was in a Castel there be¦sydes Surluse / and there encountred with hym a worshipful duke / and there sire Palomydes smote hym ouer his hors cro∣upe / And this duke was vnkel vnto kynge Arthur / Thenne sire Elyses sone rode vnto Palomydes / and Palomydes ser∣ued Elyse in the same wys•• / whanne sire Vwayne sawe thys
he was wrothe / Thenne he took his hors / and encountred with syr Palomydes / and Palomydes smote hym soo hard / that he wente to the erthe hors and man / And for to make a short ta∣le / he smote doune thre bretheren of syre Gawayns / that is for to say Mordred Gaherys and Agrauayne / O Ihesu said Ar¦thur this is a grete despyte of a Sarasyn that he shalle smyte doune my blood / And there with alle kyng Arthur was wo∣ode wrothe / and thoughte to haue made hym redy to Iuste / That aspyed sire Lamorak that Arthur and his blood were discomfyte / And anone he was redy and axed Palomydes yf he wold ony more Iuste / why shold I not said Palomy∣des / Thenne they hurtled to gyders and brake their speres / and alle to sheuerd them / that alle the castel range of theyr dyn∣tys / Thenne eyther gate a gretter spere in his hand / and they came soo fyersly to gyders / but sir Palomydes spere all to brast and syre Lamorak dyd holde / there with alle sire Palomydes lost his steroppes and lay vp ryght on his horsbak / And thē∣ne sire Palomydes retorned ageyne and took his damoysel / and sir Safere retorned his way / Soo whan he was departed kynge Arthur came to syr Lamorak and thanked hym of his goodnes / and prayd hym to telle hym his name / Syr sayd Lamorak wete thow wel / I owe yow my seruyse / but as att this tyme I wylle not abyde here / for I see of myn enemyes many aboute me ¶ Allas sayd Arthur now wote I wel / it is syre Lamorak de galys / O Lamorak abyde with me / and by my croune I shalle neuer fayle the / and not soo hardy in Gawayns hede / nor none of his bretheren to doo the ony wronge / Syre said syre Lamorak wronge haue they done me and to yow bothe / That is trouth sayd the kyng for they slewe theyre owne moder and my syster / the whiche me sore greueth / It hadde ben moche fayrer and better that ye had wedded her / for ye are a kynges sone as wel as they ¶O Ihesu sayd the noble Knyght sire Lamorack vnto Ar∣thur her dethe shalle I neuer forgete / I promyse yow and ma¦ke myn auowe vnto god I shalle reuenge her dethe as soone as I see tyme conenable / And yf hit were not at the reuerence of your hyhenes / I shold now haue ben reuenged vpon syre Gawayn & his bretheren / truly said arthur I wil make you at
acord / Syr said Lamorak as at this tyme I may not abyde with yow / for I muste to the Iustes / where is syre launcelot and the haute prynce syre Galahalt / Thenne there was a da∣moysel that was doughter to kynge Bandes / and there was a Sarasyn knyghte that hyghte Corsabryn / and he loued the damoysel / and in no wyse he wold suffre her to be maryed / for euer this Corsabryn noysed her and named her that she was oute of her mynde / and thus he lette her that she myght not be maryed