Page [unnumbered]
¶Capitulum xxxiiij
THenne vpon a day Bellangere the Conestable came to Anglydes and sayd Madame it were tyme my lord Alysander were made knyʒt / for he is a passyng strong yonge man / Syre said she I wold he were made knyghte / But thenne must I yeue hym the moost charge that euer syn∣ful moder gaf to her childe / Doo as ye lyste sayd Bellange∣re / and I shalle gyue hym warnynge that he shalle be maade knyght / Now hit wyl be wel done that he may be made knyght at oure lady day in lente / Be hit soo said Anglydes / and I pray yow make redy therfore / Soo came the Conestable to A∣lysander and told hym that he shold at oure lady in lente be made knyghte / I thanke god said Alysander these are the best tydynges that euer came to me / Thenne the Conestable ordey∣ned twenty of the grettest gentylmens sones and the best born men of the countrey that shold be maade knyghtes that same day that Alysander was made knyght / Soo on the same daye that Alysander and his twenty felawes were made Knygh∣tes / at the offrynge of the masse there came Anglydes vnto her sone and sayd thus / ¶ O fayre swete sone I charge the vpon my blessynge and of the hyghe ordre of chyualry that thou ta¦kest here this day / that thow vnderstande what I shalle saye / and charge the with alle / There with alle she pulled out a blo¦dy dobblet and a blody sherte that were bebledde with old blo∣od / whanne Alysander sawe this / he starte abak and waxed paale / and sayd fayre moder what maye this meane / I shall telle the fayre sone / thus was thyne owne faders dobblett and sherte that he ware vpon hym that same daye that he was sla∣yne / and there she told hym why and wherfore / And hou for his goodenes kynge Marke slewe hym with his daggar afore myn owne eyen / And therfor this shalle be your charge that I I shalle gyue the