[Le morte darthur]

¶Capitulum xxxij

NOw torne we to another mater that felle bitwene kyng Marke and his broder that was called the good pry∣nce Bodwyne that alle the peple of the countrey loued passy∣nge wel / So hit befelle on a tyme that the mescreaunts Sa∣rasyns londed in the countreye of Corne Waile soone after the∣se Sessoyns were gone / And thēne the good prynce Boudw∣yne at the landynge he areysed the countrey pryuely and ha∣stly / And or hit were day / he lete put wylde fyre in thre of his owne shyppes / and sodenly he pulled vp the ••ayle / And with the wynde he made tho shyppes to be dryuen amonge the nauye of the Sarasyns / And to make shorte tale tho thre shippes set on fyre alle the shippes that none were saued / And atte poynt of the day the good prynce Boudwyn with all his felauship sette on the mescreauntes with shoutes and cryes and slewe to the nombre of xl / M / and lefte none on lyue / whan kynge Marke wyst this he was wonderly wrothe that his broder sh∣old wynne suche worship / And by cause this prynce was bet∣ter byloued than he in all that countrey / And that al so Boud¦wyn loued wel sir Tristram / therfore he thoughte to slee hym

And thus hastly as a man oute of his wytte he sente for pr∣ynce boudwyn / & Anglides his wyf / & bad them brynge theyre yonge sone with them that he myght see hym / Alle this he dyd to the entente to slee the child as wel as his fader / for he was the falsest traitour that euer was borne / Allas for his goode∣nes and for his good dedes this gentyl prynce Boudwyn was slayne / Soo whan he came with his wyf Anglydes the Kynge made them fayre semblaunt tyl they had dyned / And whanne they had dyned / Kynge Marke sente for his broder and said thus / Broder how spedde yow whan the mes¦creaunts aryued by yow / me semeth hit had be youre parte to haue sente me word that I myght haue ben at that Iourneye for it had ben reason that I had had the honour and not you Syre said the Prynce Boudwyn it was soo that and I had taryed tyl that I had sente for yow / tho myscreauntes hadde destroyed my countrey / Thou lyest fals traytour said Kynge Marke / for thou arte euer aboute for to wynne worship from me / and put me to dishonour / and thow cheryst that I hate / And there with he stroke hym to the hert with a daggar / that he neuer after spake word / Thenne the lady Anglydes made grete dole and swouned / for she sawe her lord slayne afore her face / Thenne was there no more to doo but prynce Boudwyn was despoylled and brought to buryels / But Anglydes pry¦uely gat her husbandes dobblet and his sherte / and that she kepte secretely / Thenne was there moche sorowe and cryenge / and grete dole made sir Tristram / sir Dynas / sir Fergus / and so dyd alle knyghtes that were there / for that prynce was pas¦syngly wel byloued / Soo la Beale Isoud sente vnto An∣glydes the prynce Boudwyns wyf and badde her auoyde lyʒ¦tely or els her yonge sone Alysander le Orphelyn shold be sla¦ye / whanne she herd this / she took her hors and her child / and rode with suche poure men as durst ryde with her /