To the extent possible under law, the Text Creation Partnership has waived all copyright and related or neighboring rights to this keyboarded and encoded edition of the work described above, according to the terms of the CC0 1.0 Public Domain Dedication (http://creativecommons.org/publicdomain/zero/1.0/). This waiver does not extend to any page images or other supplementary files associated with this work, which may be protected by copyright or other license restrictions. Please go to http://www.textcreationpartnership.org/ for more information.
NOw torne we vnto sire Dynadan that fonde these seuen knyghtes passynge heuy / And whanne he wyste how that they sped / as heuy was he / My lord Vwayne said Dy∣nadan / I dare ley my hede it is sir Lamorak de galys / I pro∣myse you alle / I shalle fynde hym / and he may be founde in
this countrey / and soo syre Dynadan rode after this knyghte / And so dyd kyng Marke that sought hym thurgh the forest Soo as Kyng Mark rode after sir Palomydes / he herd a noy∣se of a man / that made grete dole / Thenne kyng Mark rode as nyghe that noyse as he myght and as he durst / Thenne was he ware of a knyght that was descended of his hors / and hadde putte of his helme / and there he made a pyteous complaynte / and a dolorous of loue
¶Now leue we that / and talke we of sire Dynadan that ro∣de to seke syr Palomydes / And as he came within a foreste / he mette with a Knyght a chacer of a dere / Syr said sire Dyna∣dan mette ye with a Knyghte with a shelde of syluer / and ly¦ons hedes / ye fayr knyghte sayd the other / with suche a knyght mette I with but a whyle agone / and strayte yonder waye he yede / Gramercy said sir Dynadan / for myght I fynde the trak of his hors I shold not fayle to fynde that Knyghte / Ryghte so as sir Dynadan rode in the euen late / he herd a doleful no∣yse as it were of a man / ¶Thenne sir Dynadan rode toward that noyse / And whanne he came nyghe that noyse / he alyghte of his hors / and wente nere hym on foote / Thenne was he wa¦re of a knyght that stood vnder a tree and his hors teyed by hym / and the helme of his hede / and euer that knyght made a doleful complaynte as euer made knyghte / And alweyes he made his complaynte of la Beale Isoud the Quene of Cor∣newaile / and said A fayr lady why loue I the / for thou art fayrest of alle other / and yet shewest thou neuer loue to me / nor bounte / Allas yet must I loue the / And I may not blame the fayre lady / for myn eyen ben cause of this sorowe / And yet to loue the I am but a foole / for the best knyghte of the world loueth the / and ye hym ageyne / that is sir Tristram de Lyones And the falsest kynge and Knyghte is youre husband / and the moost coward and ful of treason is your lord kyng ma∣rke ¶Allas that euer so fayre a lady and pyerles of alle other shold be matched with the moost vylaynous knyght of the world / Alle this langage herd Kynge Marke / what sir Palomydes said by hym / wherfore he was adradde / whanne he sawe sire Dynadan lest and he aspyed hym / that he wold telle syre Palomydes that he was Kynge Marke / and there
for he withdrewe hym and took his hors and rode to his men where he commaunded hem to abyde / And soo he rode as fast as he myght vnto Camelot / & the same day he fonde there Amant the knyght redy that afore Arthur had appeled hym of trea∣son / and soo lyghtely the Kynge commaunded them to do ba∣taile / And by mysauenture kynge Marke smote Amant tho∣rugh the body / And yet was Amant in the ryghtuous quarel And ryghte soo he took his hors and departed from the court for drede of sir Dynadan that he wold telle syr Tristram and sir Palomydes what he was / ¶Thenne were ther maydens / that la Beale Isoud hadde sente to sire Tristram that knewe sir Amant wel