¶Capitulum iiij
ANd anone there came an honderd knyʒtes about hym and assaylled hym / and whan he sawe his hors shold be slayne / he alyghte and voyded his hors / & putte the brydel vn¦der his feete / and so put hym out of the gate / And whan he had soo done / he hurled in amonge hem / and dressid his bak vnto a ladyes chamber walle / thynkynge hym self that he had leuer dye there with worship / than to abyde the rebukes of the damoi¦sel Maledysaunt / And in the meane tyme as he stood & fouʒt that lady whos was the chamber wente oute slyly at her posi∣erne / and without the gates she fond la cote male tayles hors and lyghtly she gate hym by the brydel / and teyed hym to the posterne / And thenne she wente vnto her chambre slyly ageyn for to behold hou that one knyghte fought ageynst an honderd knyghtes / And whan she had behold hym longe / she wente to a wyndowe behynde his bak / and said thou knyght thou fygh∣test wonderly wel / but for alle that at the last thou must ne∣des dye / But and thou canst thorou thy myʒty prowesse wyn∣ne vnto yonder posterne / for there haue I fastned thy hors to abyde the / but wete thou wel thou must thynke on thy wor∣ship / & thynke not to dye / for thou maiste not wynne vnto that posterne without thou doo nobly and myghtly / whan la cote male tayle herd her saye so / he gryped his swerd in his handes and putt his sheld fayre afore hym / & thorou the thyckest prees he thrulled thorou them / And whan he came to the posterne / he fond there redy four knyghtes / and at two the fyrst strokes he slewe two of the knyghtes / & the other fledde / & soo he wanne his hors and rode from them / and alle as it was it was reher∣ced in kynge Arthurs courte / hou he slewe twelue knyghtes within the castel Orgulous / and so he rode on his waye / And in the meane whyle the damoysel said to sir Mordred I wene my foolysshe knyʒt be outher slayn or takē prysoner / thēne we¦re they ware where he came rydyng / And whan he was come