Page 20
〈 in non-Latin alphabet 〉〈 in non-Latin alphabet 〉.
SCOTIA, te visit Rex, Anglis ecce relictis,
Quaeritur, insuetae quae pote causa viae?
Externi nil est, sinit hoc non Anglia, non Rex:
Hic habuit quantum optabat, & illa dabat.
Sollicitauit amor, qui se festinat amato
Vnire, hinc gestit regna subire sua.
Magnus amor Patriae, qui quondam numina coelo
In terras (vates sic retulêre) tulit.
Magnus amor Patriae, quem nullâ exstinxeris arte.
Aphrica cum Loto fabula vana fuit.
Salmoni hunc placuit Regi componere, primis
Dedoceat nullus quem remeare vadis.
Et potuit nullus, quin Rex succensus amore,
Te videat, solus limine mouit amor.
Solus amor motum prouexit, denique Regem
Ad te perduxit, Scotia, solus amor.
Quare age, nunc alacri Regem cape Scotia vultu:
Testare & Regis quàm tibi gratus amor.
Nec trepides pompis succumbere, plenus amoris
Rex petit affectus commoda signa tui.
Dona Deo in coelis gratissima, plenus amoris
Nonne animus? Regi, Scotia, gratus amor:
Et longùm gratus, longùm sit nexus amoris
Inter te & regem, Scotia chara, tuum.
〈 in non-Latin alphabet 〉〈 in non-Latin alphabet 〉, REX, SCOTIA, EDINVM.
ANglia multa tibi debet, glacialis Ierne
Multa, ah si possent debita nosse sua.