Page 42
ORTA Caledoniis est lux optata per annos
Multos, spe & votis ante petita piis.
Non fulsit terris tam clarâ lampade Phoebus
(Qui radiis, terram percutit auricomis)
Quàm tua magnanimos decorat praesentia Scotos:
Torpentes Musas mulcet & exhilarat.
Quae ad te confugiunt, O vatum maxime Princeps,
Artes Phoebaeas qui regis arte tua.
Quem pietas, quem vera fides, quem celsa potestas
Regia condecorat, semideumque facit.
Pectoris alma tui radios tua Scotia sensit.
Quam nunc incensam reddis amore tui.
Templa, Arces, Vrbes, augusta Palatia, Campi
Gratantur reditum, MAGNE IACOBE, tuum.
Nestora vt ingenio superas, tibi Nestoris annos
Exoptat votis Scotia perpetuis.
ROBERTVS SMITHVS.