The morale prouerbes of Cristyne

The morale prouerbes of Cristyne

tHe grete vertus of oure elders notable Ofte to remembre is thing profitable An happy hous is. where dwelleth prudence For where she is Raison is in presence A temperat man cold from hast asseured May not lightly long saison be miseured Constante couraigis in sapience formed Wole in noo wise to vicis be conformed Where nys Iustice▪ that lande nor that coūtre May not long regne in gode prosperite Withouten faith may there noo creature Be vnto god plaisant. as saith scripture Propre worldly and to god acceptable Can noman be. but he be charitable Hope kepeth not promys in eury wise Yet in this world hit guideth māny a wise In greet estat ligth not the gloire But in vertu whiche worth is memoire A cruell prynce gronded in auarice Shulde his peuple not truste. if he be wise Yiuyng in tyme and wisely to refreigne Maketh oon welthy & in estat to reigne Now preyse now blame com̄unely by vsance Sheweth folye and noo maniere constance A pryncis court withoute a gouuerneur Beyng prudent can not leste in honneur

Grete diligence with a good Remembrance Dooth a man ofte to hygh honneur auance A fool can preyse nought for lak of Raison And the wise man̄ hath noo presumpcion A mighty prynce that wole here his consaille Paciently, to prospere can not faille He is prudent, that maketh pourueyance For thing to come bifore er falle the chance A man in pride fixed with hert and mynde Casteth noo drede, yet woo soone dooth him finde That lande hath hap. wherof the lord or kyng Is sad & trewe, and vseth good lyuyng Lightly to here & to loue flaterye Gendreth errour & werre dooth multiplye Wise is not he. that weneth to be sure Of his estat, though he haue hit in vre In souffisance of this worldis richesse Is surer Reste than in the grete largesse To hante vertus and vicis to bannysshe Maketh a man wise, & godly to finysshe A benigne prince of gode condicions Draweth māny oon to his opinions He is happy that can exemple take Of his neighburgh seing him sorwes make Wisdam thay lakke, that fortune doo not drede For māny a wight to trouble dooth she lede Muche to enquire is noo thing profitable Nor for to be greetly entermettable

To muche trustyng hath hindred māny a man Soo hath wenyng, that wel deceyue oon can A Railing man & for alier knawe Vnnethe hath truste. though he telle asooth sawe He is wise, that his Ire can restreigne And in angre his tongue also refreigne He▪ that is fed & hath his hertis luste What peigne the hungry hath. he wole not truste Falsehede is not to cautele soo applied But by som̄e folkis somtyme hit is aspied His Renon shal be good & long lasting That hath the fame of trouthe in his deling Ful greet peigne is to change condition After. that aige hath oon in hire bandon Whoo wole him self to greet estat enhance Muste byfore he acqueinted with suffrance Faueur gileth, and māny a tyme hit tourneth The Right to wrong, & wrong to right retourneth Oon aughte to werke. whil he hath liberte For saison lost can not Recouured be To muche to thinke or elles hauyng noo thought Maketh oon foryete suche thyng, as he ne ought An aiged man withouten wit or connyng Is a vessel▪ that vertu is lakkyng He▪ that secheth often other to blame Yiueth right cause to here of him the same Trewe gentillesse can be noon other thing But the palais where honneur is dwellyng

Blame & reprief to haue is he worthy That seeth the good and Iugeth contrary He. that may not euyl companye escheue Yet at the lest late him soone thens Remeue Grete folye is in him. that taketh hede Vpon other, and not to his owen nede Necessite at somtyme to consente Causeth famyne greet trouble and tormente Repented hath māny a creature Thyng doon away. whiche in his hand was sure Courtoise spekyng refreigneth ofte Ire For to the hert hit is a greet plaisire Often is seen a man̄ in Indigence To hygh estat comen by his diligence Opinions with faueured sentence Guideth the world more than vraye seyence There aughte noman to be fiers ne cruelle For what may falle him self, he can not telle Rather to bowe, than breke is profitable Humylite is a thing commendable He is a fool. that dooth his charge enhance Vpon promys without other substance Hit sitteth not a woman to diffame For vpon him self shal retorne the blame For to foryete a yifte or courtosy Sheweth ingratitude euydently Sured maniere & fewe wordis wel sette In women dooth rightwel, where thay be mette

Seruice in court is noo seur heritaige Hit failleth ofte with litle auantaige He. that spurneth an al with violence Vnto him self dooth moost grief & offence To torne to Iape an Iniury or a wroong Is greet wisdam to be vsed emoong Goodly raisons not wel taken̄ ne construde Semeth floures caste emong bestis rude A wrettheful man or oon in geleusye Aughte haue noo truste. for often thay wole lye Cruell spekyng in a matiere hayneuse Axeth answer angry and despiteuse There can noo good endure saison ne space But oonly suche, as cam by goddis grace Idele plaisirs vsed coustumably Be harde to change, though thay be blame worthy He that loueth euyl tales to reporte To make debate semeth wel his disporte Necessite, pouert and Indigence Causeth māny greet Inconuenience A meene estat is better to entende Than hygh climmyng lest that oon sone descende Right to relesse somtyme is noo dotaige Soo that hit be for a more auantaige In wel doyng hauyng a trewe Renon Bringueth a man to gode conclusion Foryeting god for this worldis richesse Sheweth noo faith, but slauthe & grete latchesse