[The Ploughman's tale]
About this Item
- Title
- [The Ploughman's tale]
- Publication
- Printed at London :: By Thomas Godfray,
- [ca. 1535]
- Rights/Permissions
-
To the extent possible under law, the Text Creation Partnership has waived all copyright and related or neighboring rights to this keyboarded and encoded edition of the work described above, according to the terms of the CC0 1.0 Public Domain Dedication (http://creativecommons.org/publicdomain/zero/1.0/). This waiver does not extend to any page images or other supplementary files associated with this work, which may be protected by copyright or other license restrictions. Please go to http://www.textcreationpartnership.org/ for more information.
- Cite this Item
-
"[The Ploughman's tale]." In the digital collection Early English Books Online. https://name.umdl.umich.edu/a18566.0001.001. University of Michigan Library Digital Collections. Accessed May 10, 2024.
Pages
Page [unnumbered]
Page [unnumbered]
Page [unnumbered]
Page [unnumbered]
Page [unnumbered]
Page [unnumbered]
Page [unnumbered]
The prologue
They mowe by lawe / as they sayne
Us curse and dampne to helle brinke
Thus they putten vs to payne
With candels queynte and belles clynke
¶ They make vs thralles at her lust
And sayne we mowe nat els be saued
They haue the corne / and we the dust
Who speketh ther agayn they say he raued
¶ What man / {quod} our host / canst thou preche
Come nere and tell vs some holy thyng
¶ Syr / quod he / I herde ones teche
A preest in pulpyt a good prechyng
¶ Say / on quod our host / I the beseche
Syr I am redy at your byddyng
I pray you that no man me reproche
Whyle that I am my tale tellyng.
Thus endeth the prologue / and here foloweth the fyrst parte of this present worke.
ASterne stryfe is stered newe
In many stedes in a stounde,
Of sondrie sydes that be sewe
It semeth that some ben vnsounde:
For some be great growen vngrounde
Some ben souble / symple and small,
Whether of hem is falser founde
The falser foule mote hym befall.
¶That one syde is / that I of tell.
Popes / cardynals / and ••relates
Parsons / monkes / and Freres fell
Priours / abbottes of great estates
Of heuyn and helle they kepe the yates
And Peters successours they ben all
This is demed by olde dates
But falshed foule mote it be fall
Page [unnumbered]
The fyrst parte
¶The other syde ben poore and pale
And people put out of prease
And seme caytyffes sore a cale
And euer in one without encrease
I clepeth lollers and londlese
Who toteth on hem they ben vntall
They ben arayde all for the peace
But falshed foule mote it befall
¶ Many a countrey haue a sought
To knowe the falser of these two
But euer my traueyle was for nought
All so ferre as I haue go
But as I wandred in a wro
In a wodde besyde a wall
Two foules sawe I sytte tho
The falser foule mote hym befall
¶ That one dyde plede on the Popes syde
A Gry••••on of a grymme stature
A Pellycane withouten pride
To these lollers layde his lure
He mused his mater in measure
To counsayle Christ euer gan he call
The Gry••••on shewed as sharpe as fyre
But falshed foule mote it be fall
Page [unnumbered]
Neyther crowne / ne curious couertours
Ne pylloure / ne other proude pall
Ne nought to cofren vp great treasours
For falshed foule mote it befall
¶ Preestes shulde for no catell plede
But chasten hem in charite
Ne to no bateyle shulde men lede
For inhaunsyng or her owne degree
Nat wylne syttynges in hye see
Ne souerayntie in house ne hall
All worldly worshyppe defye and flee
For who so wylleth highnes foule shal fall
¶ Alas who may suche sayntes call
That wylneth welde erthly honour
As lowe as Lucifere suche shall fall
In balefull blackenesse buylden her boure
That eggeth the people to errour
And maketh them to hem thrall
To Christ I holde suche one traytour
As lowe as Lucifere suche one shall ••all
¶ That wylleth to be kynges peeres
And higher than the Emperour
Some that were but poore Freres
Nowe wollen waxe a warryour
God is nat her gouernour
That holdeth no man his permagall
Whyle couetyse is her counsaylour
All su••he falshed mote nede fall
¶ That hye on horse wylleth ryde
In glytterande golde of great aray
I paynted and portred all in pride
No cōmen knyght may go so gaye
Change of clothyng euery day
With golden gyrdels great and small
As boystous as is bere at baye
All suche falshed mote nede fall
Page [unnumbered]
¶ With pride ponysshed the poore
And some they sustayne with sale
Of holy churche maketh an hore
And fylleth her wombe with wyne and ale
With money fyll••th many a male
And chaffren churches whan they fall
And telleth the people a leude tale
Suche false faytours foule hem fall
¶ With chaunge of many maner metes
With songe and solace syttyng longe
And fylleth her wombe / and fast fretes
And from the mete to the gonge
And after mete with harpe and songe
And eche man mote hem lordes call
And hote spyces euer amonge
Suche false fayto••rs foule hem fall
¶ And myters mo than one or two
I perled as the quenes hedde
A staffe of golde / and pyrrey lo
As heny as it were made of ledde
With clothe of golde both newe and redde
With glytterande golde as grene as gall
By dome woll dampne men to dedde
All suche faytours foule hem fall
¶ And Christes people proudly curse
With brode bokes / and brayeng bell
To putte pennys in her purse
They woll sell bothe heuyn and hell
And in her sentence and thou wylt dwell
They wyllen gesse in her gay hall
And though the sothe thou of hem tell
In great cursyng shalte thou fall
¶ That is blessed / that they blesse
And cursed that they curse woll
And thus the people they oppr••sse
And haue their lordshyppes at full
Page [unnumbered]
And many be marchantes of wolle
And to purse pennyes woll come thrall
The poore people they all to pull
Suche false faytours foule hem fall
¶ Lordes mote to hem loute
Obeysaunt to her brode blessyng
They ryden with her royall route
On a courser / as it were a kyng
With saddyll of golde glytteryng
With curyous harneys quayntly crallyt
Styroppes gaye of golde mastlyng
All suche falshed foule befall it
¶ Christes mynysters clepen they bene
And rulen all in robbery
But An••ichrist they seruen clene
Attyred all in tyranny
Wytnesse of Iohēs prophesy
That Antichrist is her admyrall
Tyffelers attyred in trechery
All suche faytours foule hem fall
¶ Who sayth that some of hem may synne
He shalbe done to be deed
Some of hem woll gladly wynne
A••l ayenst that / whiche god forbede
All holyest they clepen her heed
That of her rule is regall
Alas that euer they eten breed
For all suche falshed woll foule fall
¶ Her heed loueth all honour
And to be worshypped in worde and dede
Kynges mote to hem knele and coure
To the Apostels / that Christ forbede
To Popes hestes suche taketh more hede
Than to kepe Christes cōmaundement
Of golde and syluer mote ben her wede
They holdeth hym hole omnypotent
Page [unnumbered]
¶ He ordayneth by his ordynaunce
To parysshe preestes a powere
To another a greatter auaunce
A greatter poynt to his mystere
But for he is hyghest in erthe here
To hym reserueth he many a poynt
But to Christ that hath no pere
Reserueth he neyther opyn ne ioynt
¶ So semeth he abouen all
And Christ abouen hym nothyng
Whan he sytteth in his stall
Dampneth and saueth as hym thynke
Suche pride tofore god dothe stynke
An Angell badde Iohn̄ to hym nat knele
But onely to god do his bowyng
Such wyllers of worship must nede yuel fele
¶ They ne clepen Christ / but Sctūs de{us}
And clepen her heed / Sanctissimus
They that suche a secte sewys
I trowe they taken hem amysse
In erthe here they haue her blysse
Her hye mayster is Bellyall
Christes people from hem wysse
For all such false wyll foule fall
Page [unnumbered]
And bade hem be bothe symple and slye
And carke nat for no catall
But trusteth on god that sytteh on hye
For all ••alse shull ••oule fall
¶ These wollen make men to swere
Ayenst Christes cōmaundement
And Christes membres all to tere
On Roode / as he were newe yrent
Suche lawes they maken by cōmen assent
Echone it choweth as a ball
Thus the poore be fully shent
But euer ••alshed foule it fall
¶ They vsyn no Simony
But sellen churches and priories
Ne they vsen no Enuy
But cursen all hem contraries
And hyereth men by dayes and yeres
With ••trength to holde hem in her stall
And culleth all her aduersaries
Therfore falshed ••oule thou fall
¶ With purse they purchase personage
With purse they paynen hem to plede
And men of warre they woll wage
To brynge her enemyes to the dede
And lordes lyues they woll lede
And moche take and gyue but small
But he it so gete / ••rom it shall shede
And make suche false right foule fall
¶ They halowe nothyng but for hyr••
Churche / ••ont / ne vestement
And make orders in euery shyre
But preestes paye ••or the parchement
O•• ria••ours they taken rent
T••erwith they smere the shepes skall
For many churches ben ofte suspent
All suche falshed yet foule it fall
Page [unnumbered]
¶ Some lyueth nat in lechery
But haunten wenches / wydowes / & wyues
And punyssheth the poore for putry
Them selfe it vseth all her lyues
And but a man to them shriues
To heuyn come neuer he shall
He shalbe cursed as be caytyues
To hell they sayne that he shall fall
There was more mercy in Maximyen
And in Nero / that neuer was good
Than is nowe in some of them
Whan he hath on his furred hoode
They ••olowe Christ that shedde his blode
To heuen / as buckette in to the wall
Suche wreches ben worse than wode
And all suche ••aytours foule hem fall
¶ They gyue her almesse to the ryche
To mayn••••ynours / and to men of lawe
For to lordes they woll be lyche
An harlottes sonne nat worthe an hawe
Sothfastnesse suche han slawe
They kembe her crokettes with christall
And drede of god they haue downe drawe
All suche faytours foule hem fall
¶ They maken parsons for the penny
And canons of her cardynals
Unnethes amongest hem all any
That he ne hath glosed the gospell fals
For Christ made neuer no cathedrals
Ne with hym was no cardynall
With a Redde hatte as vsyn mynstrals
But falshed foule mote it befall
Page [unnumbered]
The tithyng of Turpe lucrum
With these maisters is meynall
Tithyng of bribry / and larson
Wyll make falshed full foule to fall
¶ They taken to ferme her sompnours
To harme the people what they may
To pardoners / and false faytours
Sell her seales I dare well say
And all to holden great array
To multiply hem more metall
They drede full lytell domes day
Whan all suche shall foule fall
¶ Suche harlottes shull men dysclaunder
For they shullen make her gree
And ben as proude as Alexaunder
And sayne to the poore / wo be ye
By yere eche preeste shall paye his ••ee
To encrease his lemmans call
Suche heerdes shull well yuell the
And all suche false shull foule fall
¶ And if a man be falsely famed
And wolde make purgacioun
Than woll the offycers be agramed
And assigne hym fro towne to towne
So nede he must paye raunsome
Though he be clene / as is christall
And than haue an absolutioun
But all suche false shull foule fall
¶ Though he be gyltie of the dede
And that he maye money pay
All the whyle his purse woll blede
He maye vse it fro day to day
These bysshoppes offycers gone full gay
And this game they vsen ouer all
The poore to pyll is all their pray
All suche false shull foule fall
Page [unnumbered]
¶ Alas / god ordayned neuer suche lawe
Ne no suche crafte of couetyse
He forbade it by his sawe
Suche gouernours mowen of god agryse
For all his rules is rightwyse
These newe poyntes ben pure papall
And goddes lawe they dispyce
And all suche fayt••urs shull foule fall
¶ They sayne that Peter had the key
Of heuyn and hell / to haue and hol••e
I trowe Peter toke no money
For no synnes that he solde
Suche successours ben to bolde
In wynnyng all their witte they wrall
Her conscience is waxen colde
And all suche faytours ••oule hem fall
¶ Peter was neuer so great a fole
To leaue his key with suche a lorell
Or to take suche cursed suche a tole
He was aduysed nothyng well
I trowe they haue the key of hell
Their maister is of that place marshall
For there they dressen hem to dwell
And with false Lucifere there to fall
¶ They ben as proude as Lucifarre
As angry / and as enuyous
From good faithe they ben full farre
In couetyse they ben curyous
To catche cattell as couytous
As hounde / that for hungre woll yall
Ungoodly / and vngratious
And nedely suche falshed shall fonle fall
¶ The pope and he were Peters hey••e
Me thynke he erreth in this case
Whan choyse of bysshoppes is in dispeyre
To chosen hem in dyuers place
Page [unnumbered]
A lorde shall write to hym for grace
For his clerke anone pray he shall
So shall he spede his purchase
And all suche false foule hem fall
¶ Though he can no more good
A lordes prayer shalbe spedde
Though ••e ••e wylde o•• wyll or wood
Nat vnderstandyng what men han redde
A leude boster / and that god ••orbede
As good a bysshoppe is my horse ball
Suche a Pope is ••oule be stedde
And a•• la••t woll ••oule ••all
¶ He maketh bysshoppes for erthly thanke
And nothyng ••or Christes sake
Suche that ••en full fatte and ranke
To soule heale none hede they take
All is well done what euer they make
For they shall answere at ones for all
For wo••ldes thanke / suche worch and wake
And all suche ••alse shall ••oule fall
¶ Suche that canne nat her Crede
With prayer shull be made prelates
Nou••her canne the gospell rede
Suche sh••ll nowe welde hye estates
The hye goodes frendshyp hem makes
They toteth on her sōme totall
Suche bere the keyes of hell yates
And all suche false shall foule fall
¶ They forsake for Christes loue
Traueyle / hungre / thurst / and colde
For they ben ordred euer all aboue
Out of youthe tyll they ben olde
By the dore they go / nat in to the folde
To helpe their shepe they nought trauall
Hyred men all suche I holde
And all suche false foule hem fall
Page [unnumbered]
For Christ her kyng they woll forsake
And knowe hym nought for his pouerte
For Christes loue they woll wake
And drynke pyement ale aparte
Of god they seme nothyng a ferde
As lusty lyueth / as dyde Lamuall
And dryuen her shepe in to deserte
All suche faytours shull foule fall
Christ had .xii. apostels here
Nowe saye they / there may be but one
That may nat erre in no manere
Who leueth nat this ben lost echone
Peter erred / so dyde nat Iohn̄
Why is he cleped the principall?
Christ cleped hym Peter / but hym selfe y• stone
All false faytours foule hem fall
¶ Why cursen they the croysery
Christes christen creatures
For bytwene hem is nowe enuy
To be enhaunsed in honours
And christen lyuers with her labours
For they leuyn on no man mortall
But do to dethe with dishonours
And all suche false foule hem fall
¶ What knoweth a tyllour at the plowe
The popes name / and what he hate
His crede suffyseth to hym ynowe
And knoweth a cardynall by his hatte
Rough is the poore vnrightly latte
That knoweth Christ his god royall
Suche maters be nat worth a gnatte
But suche false faytours foule hem fall
¶ A kyng shall knele and kysse his showe
Christ suffred a synfull to kysse his fete
Me thynketh he holdeth hym hye ynowe
So Lucifer dyd / that hye sette
Page [unnumbered]
Such one me thynketh hym selfe foryete
Eyther to the trouth he was nat call
Christ that suffred woundes wete
Shall make suche falshed foule fall
¶ They layeth out her large nettes
For to take syluer and golde
Fyllen coffers / and sackes fettes
There as they soules catche sholde
Her seruauntes be to them vnholde
But they can doublyn their rentall
To bygge hem castels / and bygge hem holde
And all suche false foule hem fall
¶ Here ••ndeth the fyrst part of this boke•• and herafter foloweth the seconde parte
TO accorde with this worde fall
No more Englysshe can I fynde
Shewe another nowe I shall
For I haue moche to saye behynde
Howe preestes han the people pynde
As curteys Christ hath me kende
And putte this matter in my mynde
To make this maner men amende
¶ Shortly to shende hem / and shewe nowe
Nowe wrongfully they worche and walke
O hye god / nothyng they tell / ne howe
But in goddes worde / telleth many a balke
In hernes holde hem and in halke
And prechyn of tythes and offrende
And vntruely of the gospell talke
For his mercy god it amende
¶ What is Antichrist to saye
But euyn Christes aduersary
Suche hath nowe ben many a day
To Christes byddyng full contrary
Page [unnumbered]
That from the trouthe clene varry
Out of the waye they ben wende
And Christes people vntruely cary
God for his pytie it amende••
¶ That lyuen contrary to Christes lyfe
In hye pride agaynst mekenesse
Agaynst sufferaunce they vsen stryfe
And angre ayenst sobrenesse
Agaynst wysedome wylfulnesse
To Christes tales lytell tende
Agaynst measure outragyousnesse
But whan god woll it maye amende
¶ Lordly lyfe ayenst lowlynesse
And demyn all without mercy
And couetyse ayenst largesse
Agaynst trewth trechery
And agaynst almesse enuy
Agaynst Christ they comprehende
••or chastyte they maynteyne lechery
God for his grace this amende
¶ Ayenst penaunce they vse delightes
Ayenst sustraunce stronge defence
Ayenst god they vsen yuell rightes
Agaynste pytie punysshementes
Open yuell ayenst contynence
Her wicked wynnyng worse dispende
Sobrenesse they sette in to dispence
But god for his goodnesse it amende
¶ Why cleymen they holy his powere
And wranglen ayenst all his hestes
His lyuyng folowen they nothyng here
But lyuen worse than wytlesse beestes
Of fysshe and flesshe they louen feestes
As lordes they ben brode ykende
Of goddes poore they haten gestes
God for his mercy this amende
Page [unnumbered]
¶ With Dyuers suche shall haue her dome
That sayne that they be Christes frendes
And do nothyng as they shulde done
All suche ben falser than ben fendes
On the people they ley suche bendes
As god is in erth they han offende
Sucour for suche Christ nowe sende vs
And for his mercy this amende
¶ A token of Antichrist they be
His careckes ben nowe wyde yknowe
Receyued to preche shall no man be
Without token of hym I trowe
Eche christen preest / to prechyn owe
From god aboue they ben sende.
Goddes worde / to all folke for to showe
Synfull man for to amende
¶ Christ sente the poore for to preche
The royall riche he dyd nat so
Nowe dare no poore the people teche
For Antichrist is ouer all her foe
Amonge the people he mote go
He hath bydden / all suche suspende
Some hath he hente / & thynketh yet mo
But all this god may well amende
¶ All tho that han the worlde forsake
And lyuen loly / as god badde
In to her prison shullen be take
Betyn and bounden / and forthe ladde
Herof I rede no man be dradde
Christ sayd / his shulde be shende
Eche man ought herof be gladde
For god full well it woll amende
Page [unnumbered]
Yet Peter had one of tho
But christ / to Peter smyte gan defende
And in to the sheth badde putte it tho
And all suche myscheues god amende
¶ Christ badde Peter kepe his shepe
And with his swerde forbade hym smyte
Swerde is no tole with shepe to kepe
But to sheperdes that shepe woll byte
Me thynketh suche sheperdes ben to wyte
Ayen her shepe with swerde that contende
They driue her shepe with great dispyte
But all this god may well amende
¶ So successours to Peter be they nought
Whom Christ made chefe pastoure
A swerde no sheperde vsen ought
But he wolde ••lee / as a bochoure
For who so were Peters succes••our
Shulde bere his shepe tyll his backe bende
And shadowe hem from euery shoure
And all this god maye well amende
¶ Successours to Peter ben these
In that that Peter Christ forsoke
That had leuer the loue of god lese
Than a sheperde had to lese his hoke
He culleth the shepe as dothe the coke
Of hem taken the woll vntrende
And falsely glose the gospell boke
God for his mercy them amende
¶ After Christ had take Peter the kay
Christ sayd / he muste dye for man
That Peter to Christ gan withsay
Christ badde hym go behynde Sathan
Suche coūsaylours many of these men han
For worldes wele / god to offende
Peters successours they ben for than
But all suche god may well amende
Page [unnumbered]
¶ For Sathan is to say no more
But he that contrary to Christ is
In this they lerne Peters lore
They sewen hym whan he dyd mysse
They folowe Peter forsothe in this
In all that Christ wolde Peter reprehende
But nat in that that longeth to heuyn blysse
God for his mercy hem amende
¶ Some of the Apostels they sewen in case
Of ought that I can vnderstonde
Hym that betrayed Christ / Iudas
That bare the purse in euery londe
And all that he myght sette on honde
He hydde and stale / and myspende
His rule these traytours han in honde
Almighty god hem amende
¶ And at last his lorde gan tray
Cursedly through his false couetyse
So wolde these / trayen hym for money
And they wysten in what wyse
They be seker of the selfe ensyse
From all sothnesse they ben frende
And couetyse chaungen with queyntyse
Almighty god all suche amende
¶ Were Christ on erthe here efte sone
These wolde dampne hym to dye
All his hestes they han fordone
And sayne his sawes ben heresy
And ayenst his commaundementes they crye
And damp••e all his to be brende
For it lyketh nat hem suche losengery
God almighty hem amende
¶ These han more myght in Englande hete
Than hath the kynge and all his lawe
They han purchased hem suche powere
To taken hem whom lyste nat knawe
Page [unnumbered]
And say that heresy is her sawe
And so to prysone woll hem sende
It was nat so by elder dawe
God for his mercy it amende
¶The kynges lawe woll no man deme
Angerlyche withouten answere
But if any man these mysqueme
He shalbe ••eted as a bere
And yet wel worse they woll hym tere
And in prysone woll hem pende
In gyues / and in other gere
Whan god woll / it maye mende
¶ The kyng taxeth nat his men
But by a••••en••e of the cōmynalte
But these eche yere woll raunsom hem
Maisterfully / more than doth he
Her seales by yere better be
Than is the kynges in extende
Her offycers han gretter fee
But this myschefe god amende
¶ For who so woll proue a testament
That is nat all worthe tenne pounde
He shall paye for the parchement
They thirde parte of the money all rounde
Thus the people is raunsounde
They say suche parte to hem shulde apende
There as they grypen it gothe to grounde
God for his mercy it amende
¶ A symple fornycacioun
Twenty shyllynges he shall paye
And than haue an absolution
And all the yere vsen it forthe he may
Thus they letten hem go a stray
They recke nat though the soule be brende
These kepyn yuell Peters key
And all suche sheperdes god amende
Page [unnumbered]
¶ Wonder is / that the parlyament
And all the lordes of this londe
Herto taken so lytell entent
To helpe the people out of her honde
For they ben harder in their bonde
Worse beate / and bytter brende
Than to the kyng is vnderstande
God hym helpe this to amende
¶ What bysshoppes / what relygions
Han in this lande as moche laye fee
Lordshippes / and possessyons
More than the lordes / it semeth me
That maketh hem lese charyte
They mowe nat to god attende
In erthe they haue so hyghe degree
God for his mercy it amende
¶ The Emperour yaf the pope somtyme
So highe lordshyppe hym aboute
That at laste the sely kyme
The proude Pope putte hym out
So of this realme is in doute
But lordes be ware and them defende
For nowe these folk•• be wonder stoute
The kynge and lordes nowe this amende.
Thus endeth the seconde parte of this boke / and herafter folo∣weth the thirde
MOyses lawe forbode it tho
That preestes shuld no lordshippes welde
Christes gospell byddeth also
That they shulde no lordshippe helde
Ne Christes Apostels were neuer so bolde
No suche lordshippes to them enbrace
But smeren her shepe and kepe her folde
God amende hem for his grace
Page [unnumbered]
For they ne ben but countrefete
Men may knowe hem by her fruite
Her gretnesse maketh hem god foryete
And take his mekenesse in dispyte
And they were poore and had but lyte
They nolde nat demen after the face
But norisshe her shepe / and hem nat byte
God amende hem for his grace
¶ What canst thou preche ayenst chanons
That men clepen seculere?
They ben curates of many towns
On erthe they haue great powere
They han great prebendes and dere
Some two or thre / and some mo
A personage to ben a playeng fere
And yet they serue the kynge also
¶ And lette to ferme all that fare
To whom that woll most gyue therfore
Some woll sp••nde / and some woll spare
And some woll laye ••t vp in store
A cure or soule they care nat fore
So they mowe money take
Whether her soules be ••onne or lore
Her profytes they woll nat forsake
¶ They haue a gederyng procuratour
That can the poore people enplede
And robben hem as a rauynour
And to his lorde the money lede
And catche of quicke and eke of dede
And richen hym and his lorde eke
And to robbe the poore can gyue good rede
Of olde and yonge / of hole and syke
¶ Therwith they purchase hem lay ••ee
In londe / there hem lyketh best
And buylde also brode as a cyte
Bothe in the Est / and eke in the west
Page [unnumbered]
To purchase thus they ben full prest
But on the poore they woll nought spende
Ne no good gyue to goddes gest
Ne sende hym some that all hath sende
¶ By her seruyce suche woll lyue
And trusse that other in to treasour
Though all her parysshe dye vnshriue
They woll nat gyue a rose floure
Her lyfe shulde be as a myrrour
Bothe to lered and to leude also
And teche the people her lele labour
Suche myster men ben all mysgo
¶ Some of hem ben harde nygges
And some of hem ben proude and gay
Some spende her good vpon gygges
And fynden hem of great aray
Alas / what thynke these men to say
That thus dispenden goddis good
At the dredefull domes daye
Suche wretches shulbe worse than wood
¶ Some her churches neuer ne sye
Ne neuer o peny thyder ne sende
Though the poore parysshens for hungre dye
O peny on hem wyll they nat spende
Haue they receyuynge of the rente
They recke neuer of the remenāt
Alas the deuyll hath clene hem blen••
Suehe one is Sathanas soiournant
¶ And vsen horedome and harlotry
Couetyse / pompe / and pride
Slouthe / wrathe / and eke enuy
And sewen synne by euery syde
Alas / where thynke suche tabyde
Howe woll they accomptes yelde
From hye god they mowe hem nat hyde
Suche wyllers witte is nat worth a nelde
Page [unnumbered]
¶ They ben so roted in richesse
That Christes pouert is foryet
Serued with so many messe
Hem thinketh that Manna is no mete
All is good that they mowe gete
They wene to lyue euermore
But whan god at dome is sette
Suche treasour is a feble store
¶ Unneth mote they matyns saye
For countyng and for court holdyng
And yet he ••angleth as a iaye
And vnderstont hym selfe nothyng
He woll serue bothe erle and kyng
For his fyndyng and his fee
And hyde his ty••hynge and his offryng
This is a feble charite
¶Outher they ben proude / or coueytous
Or they ben harde / or hungry
Or they ben lyberall or lecherous
Or els medlers with marchandry
Or maynteyners of men with maistry
Or stewardes / coun••ours / or pledours
And serue god in hypocrisy
Suche preestes ben Christes false traytours
¶ They ben false / they ben vengeable
And be gylen men in Christes name
They ben vnstedfast and vnstable
To tray her lorde / hem thynketh no shame
To serue god they ben full lame
Goddes theues / and falsly stele
And falsely goddes worde defame
In wynnyng is her worldes wele
¶ Antichrist these seruen all
I pray the who may say nay?
With Antichrist suche shull fall
They folowen hym in dede and fay
Page [unnumbered]
They seruyn hym in riche array
To serue Christ suche falsely fayne
Why / at the dredefull domes day
Shull they nat folowe hym to payne?
¶ That knowen hem selfe that they done yll
Ayenst Christes cōmaundement
And amende hem neuer ne wyll
But serue Sathan by one assent
Who sayth sothe he shalbe shent
Or speketh ayenst her false lyuyng
Who so well lyueth shalbe brent
For suche ben gretter than the kyng
¶ Pope / bysshoppes / and cardyuals
Chanons / persons / and vycayre
In goddes seruyce I trowe ben false
That sacramentes sellen here
And ben as proude as Lucifere
Eche man loke whether that I lye
Who so speketh ayenst her powere
It shall be holden heresy
Loke howe many orders take
Onely of Christ / for his seruyce
That the worldes goodes forsake
Who so taketh orders / or other wyse
I trowe that they shall sore agryse
For all the glose that they conne
All sewen nat this assyse
In yuell tyme they thus begonne
Loke howe many amonge hem all
Holden nat this hye way
With Antichrist they shullen fall
For they wolden god betray
God amende hem that best may
For many men they maken shende
They weten well the sothe I say
But the dyuell hath foule hem blende
Page [unnumbered]
¶ Some on her churches dwell
Appayrelled poorely / proude of porte
The seuyn sacramentes they done sell
In cattell catchyng is her comforte
Of eche matter they wollen mell
And done hem wronge is her dispor••e
To affray the people they ben fel
And holde hem lower than dothe the lorde
¶ For the tithynge of a duke
Or of an apple / or an aye
They make men swere vpon a ••oke
Thus they foulyn Christes fay
Suche beren yuell heuyn kay
They mowen assoyle / they mowe shriue
With mennes wyues strongly play
With tr••we tyllers sturte and stryue
¶ At the wrestlyng / and at the wake
And chefe chauntours at the nale
Markette beters / and medlyng make
Hoppen and houten with heue and hale
At fayre fresshe / and at wyne stale
Dyn•• and drinke / and make debate
The seuyn sacramentes sette at sayle
Howe kepe suche they keyes of heuyn gate?
¶ Mennes wyues they wollen holde
And though that they ben ryght sory
To speke they shull nat be so bolde
For sompnyng to the consistory
And make hem saye mouthe I lye
Though they it sawe with her eye
His lemman holden openly
No man so hardy to axe why
¶ He woll haue tythyng & offrynge
Mauger who so euer it gruche
And twyse on the day he woll synge
Goddes prestes nere none suche
Page [unnumbered]
He mote on huntyng with dogge and bytche
And blowen his horne / and cryen hey
And sorcery vsen as a wytche
Suche kepyn yuell Peters key
¶ Y••t they mote haue some stocke or stone
Gayly paynted / and proudly dight
To maken men leuyn vpon
And say that it is full of might
About suche / men sette vp great lyght
Other suche stockes shull stonde therby
As darke as it were midnight
For it may make no maistry
¶ That it leude people se mowe
Thou Mary / thou worchest wonder thinges
About that / that men offryn to nowe
••ongen broches / ouches / and rynges
The pre••st purchaseth the offrynges
But he nyll offre to none ymage
Wo is the soule that he for synges
That precheth for suche a pylgrimage
¶ To men and women that ben poore
That ben Christes owne lykenesse
Men shulden offre at her dore
That su••••ryn hungre and dystresse
And to suche ymages offre lesse
That mowe nat fele thurst ne colde
The poore in spyrite gan Christ blesse
Therfore offreth to feble and olde
¶ Buckelers brode / and swerdes long
Baudrike / with ba••clardes kene
Suche toles about her necke they hange
With Antichrist suche preestes bene
Upon her dedes it is well sene
Whom they seruen / whom they honoren
Antichristes they ben clene
And goddis goodes falsely deuouren
Page [unnumbered]
¶ Of scarlet and grene gay gownes
That mote be shape for the newe
To clyppen and kyssen coūten in townes
The damosels that to the dauuce sewe
Cutted clothes to sewe her hewe
With longe pykes on her shone
Our goddes gospell is nat trewe
Eyther they seruen the dyuell or none
¶ Nowe ben preestes pokes so wyde
That men must enlarge the vestement
The holy gospell they done hyde
For they contraryen in rayment
Suche preestes of Lucifere ben sent
Lyke conquerours they ben arayde
The proude pendauntes at her ars ypent
Falsely the truthe they han betrayde
¶ Shrifte syluer suche wollen aske is
And woll men crepe to the crouche
None of the sacramentes saue askes
Without mede shall no man touche
On her bysshoppe their warant vouch
That is lawe of the decre
With mede and money thus they mouche
And thus they sayne is charyte
¶ In the myddes of her masse
They nyll haue no man but for hyre
And full shortely lette forth passe
Suche shull men fynde in eche shyre
That personages for profyte desyre
To lyue in lykyng and in lustes
I dare nat sayne / Sans ose ieo dire
That suche ben Antichristes preestes
¶ Or they yef the bysshoppes why
Or they mote ben in his seruyce
And holden forthe her harlotry
Suche prelates ben of feble emprise
Page [unnumbered]
Of goddis grame suche men agryse
For suche matters that taken mede
Howe they excuse hem / and in what wyse
Me thynketh they ought greatly drede
¶ They sayne / that it to no man longeth
To reproue them though they erre
But falsely goddis goodesse they fongeth
And therwith maynteyne wo and werre
Her dedes shulde be as bright as sterre
Her lyuyng / leude mannes lyght
They say the pope maye nat erre
Nede must that passe mannes might
¶ Though a prest lye wt his lēman all night
And tellen his felowe / and he hym
He goth to masse anone right
And sayth he syngeth out of synne
His byrde abideth hym at his inne
And dighteth his dyner the meane whyle
He syngeth his masse for he wolde wynne
And so he weneth god begyle
¶Hem thynketh long tyll they be mette
And that they vsen forthe all the yere
Amonge the folke whan he is sette
He holdeth no man halfe his pere
Of the bysshoppe he hath powere
To soyle men / or els they ben lore
His absolutyon may make them skere
And wo is the soule that he syngeth fore
¶ The Gryffon began for to threte
And sayd / of monkes canst thou ought
The Pellycane sayd / they ben full grete
And in this worlde moche wo hath wrought
Saynt Benet / that her order brought
Ne made hem neuer on suche manere
I trowe it came neuer in this thought
That they shulde vse so great powere
Page [unnumbered]
¶ That a man shuld a monke lorde call
Ne serue on knees / as a kyng
He is as proude as prince in pall
In mete / and drynke / and all thyng
Some wearyn myter and rynge
With double worsted well ydight
With royall mete and riche drinke
And rideth on a courser as a knyght
¶ With hauke and With houndes eke
With broches or ouches on his hode
Some saye no masse in all a weke
Of deynties is her most fode
With lordshippes and with bondmen
This is a royall relygyoun
Saynt Benet made ueuer none of hem
To haue lordshippe of man ne towne
¶ Nowe they ben qneynte and curious
With fyne clothe cladde and serued clene
Proude angry / and enuyous
Malyce is mouche that they meane
In catchyng crafty and couetous
Lordly lyuen in great lykyng
This lynyng is nat relygyous
Accordyng to Benette in his lyuyng
¶They ben clerkes / her courtes they ouer se
Her poore tenaunce fully they flyte
The hyre that a man amerced be
The gladlyer they woll it write
This is ferre from Christes pouerte
For all with couetyse they endyte
On the poore they haue no pyte
Ne neuer hem cherysshe but euer hem byte
¶And cōmenly suche ben comen
Of poore people / and of hem begete
That this perfection han ynomen
Her fathers ryden nat but on her fete
Page [unnumbered]
And trauaylen sore for that they ete
In pouert lyueth yonge and olde
Her fathers suffreth drought and wete
Many hungry meles / thurst / and colde
¶And all this the monkes han forsake
For Christes loue and saynt Benette
To pride and ease haue hem take
This relygion is yuell be sette
Had they ben out of relygioun
They must haue honged at the plowe
Thresshyng & dykyng fro towne to towne
With sory mete / and nat halfe ynowe
¶ Therfore they han this all forsake
And taken to riches / pride / and ••ase
Full fewe for god woll monkes hem mak••
Lytell is suche order for to prayse
Saynt Benet ordayned it nat so
But badde hem be cherelyche
In churlyche maner lyue and go
Boystous in erthe / and nat lordlych
¶ They disclanuder saynt Benette
Therfore they haue his holy curse
Saynt Benet with hem neuer mette
But if they thought to robbe his purs••
I canne no more herof tell
But they ben lyke tho before
And clene serue the dyuell of hell
And ben his treasour and his store
¶ And all suche other counterfeytours
Chanons / canons / and suche disgysed
Ben goddes enemyes and traytours
His trewe relygion han foule dispysed
Of Freres I haue tolde before
In a makynge of a Crede
And yet I coude tell worse and more
But men wolde weryen it to rede
Page [unnumbered]
¶ As goddes goodnesse no man tell might
Write ne speke / ne thynke in thought
So her falshed / and her vnright
May no man tell that euer god wrought
The Gryffon sayd / thou canst no good
Thou came neuer of no gentyll kynde
Outher I trowe thou wexest wood
Or els thou hast loste thy mynde
¶ Sulde holy churches haue no heed?
Who shulde be her gouernayle
Who shulde her rule / who shulde her reed
Who shulde her forthren / who shulde auayle
Eche man shall lyue by his trauayle
Who best doth / shall haue most mede
With strength if men the churche assayle
With strength men must defende her nede
¶ And the pope were purely poore
Nedy / and nothyng ne had••e
He shulde be driuen from dore to dore
The wicked of hym nolde nat be dradde
Of suche an heed men wolde be sadde
And synfully lyuen as hem lust
With strength / amēdes suche be made
With wepen wolues from shepe be wust
¶ If the pope and prelates wolde
So begge / & bydde / bowe and borowe
Holy churche shulde stande full colde
Her seruauntes sytte and soupe sorowe
And they were noughty foule and horowe
To worshyppe god men wolde wlate
Bothe on euyn and on morowe
Suche harlotry men wolde hate
¶ Therfore men of holy churche
Shulde ben honest in all thyng
Worshypfully goddes workes werche
So semeth it to serue Christ her kyng
Page [unnumbered]
In honest and in clene clothyng
With vessels of golde and clothes ryche
To god honestly to make offryng
To his lordshyppe none is lyche
¶ The Pellycan caste on houge crye
And sayd alas / why sayest thou so
Christ is our heed that sytteth on hye
Heddes ne ought we haue no mo
We ben his membres bothe also
And father he taught vs to call hym als
Maisters to be called defended he tho
All other maisters ben wicked and fals
¶ That taketh maistry in his name
Goostly / and for erthly good
Kynges and lordes shulde lordshyp hane
And rule the people with mylde mode
Christ for vs that shedde his blode
Badde his preestes no maystershyp haue
Ne carke nat for clothe ne ••ode
From euery myschefe he wyll hem saue
¶ Her riche clothyng shalbe ryghtwy••enesse
Her treasour / trewe lyfe shalbe
Charite shalbe her rychesse
Her lordshippe shalbe vnyte
Hope in god / her honeste
Her vessell clene conscience
Poore in spyrite / and humylyte
Shalbe holy churches defence
¶ What sayd the Gryffon may the greue
That other folkes faren wele
What haste thou to done with her lyue
Thy falshed eche man may fele
For thou canst no catell gete
But lyuest in londe as a lorell
With glosyng gettest thon thy mete
So fareth the deuyll that wonneth in hell
Page [unnumbered]
He wolde that eche man there shulde dwell
For he lyueth in clene enuye
So with the tales that thou dost tell
Thou woldest other people distry
With your glose / and your heresy
For ye can lyue no better lyfe
But clene in hypocrisy
And bringest the in wo and stryfe
¶ And therwith haue nat to done
For ye ne haue here no cure
Ye serue the dyuell / neither god ne man
And he shall paye you your hyre
For ye woll fare well at feestes
And warme clothed for the colde
Therfore ye glose goddis hestes
And begyle the people yonge and olde
¶ And all the seuyn sacramentes
ye speke ayenst / as ye were slye
Ayenst tithīges / offrynges / with your entētes
And on our lordes body falsely lye
And all this ye done to lyue in case
As who sayth / there ben none suche
And sayne the pope is nat worth a pease
To make the people ayen hym gruche
¶ And this cōmeth in by fendes
To bryng the christen in distaunce
For they wolde that no man were frendes
Leaue thy chattryng with myschaunce
If thou lyue well / what wylte thou more
Lette other men lyue as hem lyst
Spende in good / or kepe in store
Other mennes conscience neuer thou nyst
¶ ye han no cure to answere fore
What meddell ye / that han nat to done
Lette men lyue as they han done yore
For thou shalte answere for no man
Page [unnumbered]
¶ The Pellycan sayd / Syr / nay
I dispysed nat the pope
Ne no sacramente / sothe to say
But speke in charite and good hope
¶ But I dispyse her hye pride
Her richesse / that shulde be poore in ••pirite
Her wickednesse is knowe so wyde
They serue god in false habyte
And turnyn mekenesse in to pride
And lowelynesse in to hye degre
And goddis wordes turne and hyde
And that am I moued by charite
¶ To lette men to lyue so
With all my connyng and all my myght
And to warne men of her wo
And to tell hem trouthe and ryght
The sacramentes be soule hele
If they ben vsed in good vse
Ayenst that speke I neuer a dele
For than were I nothyng wyse
¶ But they that vsen hem in mysse manere
Or sette hem vp to any sale
I trowe they shall abye hem dere
This is my reason / this is my tale
Who so taketh hem vnrightfulllyche
Ayenst the tenne cōmaundymentes
Or by glose wreched lyche
Selleth any of the sacramentes
¶ I trowe they do the deuyll homage
In that they wetyn they do wronge
And therto I dare well wage
They seruyn Sathan for all her songe
To tithen and offren is holsome lyfe
So it be done in dewe manere
A man to houselyn and to shryue
Weddyng / and all the other in fere
Page [unnumbered]
¶ So it be notherfolde ne bought
Ne take ne gyue for couetyse
And it be so taken it is nought
Who selleth hem so / maye sore agryse
On our lordes body I do nat lye
I say sothe thorowe trewe rede
His flesshe and blode through his mastry
Is there / in the forme of brede
¶ Howe it is there / it nedeth nat stryue
Whether it be subgette or accydent
But as Christ was / whan he was on lyue
So is he there v••rament
If pope or cardynall lyue good lyue
As Christ commaunded in his gospell
Ayenst that woll I nat stryue
But me thynketh they lyue nat well
¶ For if the pope lyued as god bede
Pride and hyghnesse he shulde dispyse
Rychesse / couetyse / and crowne on hede
Mekenesse and pouerte he shulde vse
The Gryffon sayd he shulde abye
Thou shalbe brent in balefull fyre
All they secte I shall distrye
Ye shalbe hanged by the swyre
¶ Ye shullen be honged and to drawe
Who gyueth you leaue for to preche
Or speke ayenst goddes lawe
And the people thus falsely teche
Thou shalt be cursed with boke and bell
And disseuered from holy churche
And clene ydampned in to hell
Otherwyse but ye woll worche
Page [unnumbered]
For ye ben out of charite
And wylneth vengeaunce / as dyd Nero
To suffryn I woll redy be
I drede nat that thou canst do
¶ Christ badde ones suffre for his loue
And so he taught all his seruauntes
And but thou amende for his ••ake aboue
I drede nat all thy mayntenaunce
For if I drede the worldes hate
Me thynketh I were lytell to prayse
I drede nothyng your hye estate
Ne I drede nat your diseace
¶ Wolde ye turne and leaue your pride
your hye porte / and your richesse
your cursyng shulde nat go so wyd••
God bryng you in to rightwysenesse
For I drede nat your tyran••y
For nothyng that ye canne done
To suffre I am all redy
Syker I recke neuer howe soone
¶ The Gryffon grynned as he were wode
And loked louely as an owle
And swore by cockes herte blode
He wolde hym tere euery doule
Holy churche thou di••claundrest foule
For thy reasons I woll the all to race
And make thy flesshe to rote and moule
Losell / thou shalte haue harde grace
¶ The Gryffon flewe forthe on his waye
The Pellycane dyd sytte and wepe
And to hym selfe he gan saye
God wolde that any of Christes shepe
Hadde herde / and ytake kepe
Eche a worde that here sayd was
And wolde it write and well it kepe
God wolde it were all for his grace
Page [unnumbered]
¶ I answerde / and sayd I wolde
If for my trauayle any man wolde pay
He sayd yes / these that god han solde
For they han store of money
I sayd / tell me and thou may
Why tellest thou mennes trespace?
He sayd / to amende hem in good fay
If god woll gyue me any grace
¶ For Christ hym selfe is lykened to me
That for his people dyed on rode
As fare I / right so fareth he
He fedeth his byrdes with his blode
But these done yuell ayenst gode
And ben his fone vnder frendes face
I tolde hem howe her lyuyng stode
God amende hem for his grace
What ayleth the Gryffon / tell why
That he holdeth on that other syde
For they two ben lykely
And with kyndes robben wyde
The foule betokeneth pride
As Lucifere / that high flewe was
And sithe he dyd hym in yuell hyde
For he agylted goddis grace
¶ As byrde flyeth vp in the ayre
And lyueth by byrdes that ben meke
So these be flowe vp in to dispayre
And shenden sely soules eke
The soules that ben in synnes seke
He culleth hem / knele therfore alas
For bribry goddis forbode breke
God amende it for his grace
¶ The hynder parte is alyoun
A robber and a rauynere
That robbeth they people in erthe a downe
And in erthe holdeth none his pere
Page [unnumbered]
So fareth this foule bothe ferre and nere
And with temporell strength they people chas••
As a lyon proude in erthe here
God amende hem for his grace
¶ He flewe forthe with his wynges twayne
All droupyng / dased / and dull
But soone the Gry••••on came agayne
Of his ••oules the erthe was full
The Pellycan he had cast to pull
So great a nombre neuer sene there was
What maner of foules tellen I woll
If god woll gyue me o•• his grace
¶ With the Gryffon comen foules fele
Rauyns / rokes / crowes / and pye
Grayfoules / agadred wele
I g••rde aboue they wolde hye
Gledes and bosardes weren hem by
White molles and puttockes token her plac••
And lapwynges / that well cōneth lye
This felowshyp han for gerde her grace
¶ Long the Pellycane was out
But at last he cometh agayne
And brought with hym the Phenixe stoute
The Gry••••on wolde haue ••••owe ••ull ••ayne
His foules that ••lewen as thycke as rayne
The Phenixe tho began hem chace
To ••lye from hym it was in vayne
For he dyd vengeaunce and no grace
¶ He slewe hem downe without mercy
There astarte neyther free ne thrall
On hym they cast a xufull crye
Whan the Gry••••on downe was fall
He bete hem nat / but slewe hem all
Whither he hem droue no man may trace
Under the erthe me thought they yall
Alas they had a feble grace
Page [unnumbered]
¶ The Pelycan than axed tyght
For my wrytyng if I haue blame
Who woll for me fyght of flyght?
Who shall shelde me from shame
He that had a mayde to dame
And the lambe that slayne was
Shall shelde me from gostly blame
For erthely harme is goodis grace
¶ Therfore I pray euery man
Of my writyng haue me excused
This writynge writeth the Pellycan
That thus these people hath dispysed
For I am fresshe ••ully aduysed
I nyll nat maynteyne his manace
For the deuyll is o••ten disguysed
To brynge a man to yuell grace
¶ Wyteth the Pellycane and nat me
For herof I nyll nat auowe
In hye ne in lowe / ne in no degre
But as a fable take i•• ye mowe
To holy churche I wyll me bowe
Eche man to amende him Christ sende space
And for my writynge me alowe
He that is almyghty for his grace
¶ Finis
¶ Printed at Lon∣don by Thomas Godfray,
Cum priuilegio,