This present boke shewyth the manere of hawkynge [and] huntynge and also of diuysynge of cote armours. It shewyth also a good matere belongynge to horses: wyth other co[m]mendable treatyses. And ferdermore of the blasynge of armys: as here after it maye appere.

LYke wyse as in the boke of hawkynge aforsayde are wryten and noted the termys of playsure be longynge to gentylmen: hauynge delyte therin. In the same manere this boke folowynge shew∣yth: to suche gentyll persones the manere of hun¦tynge for all manere of bestys / whether they ben bestys or Venery or or Chace or Rascall. And also it shewith al¦termys conuenyent aswell to the houndes as to the beestys a∣forsayd. And in certen there ben many dyuers of theym: as is de¦claryd in the boke folowynge.

¶Bestys of Venery.

WHere so euer ye fare by fryth or by fell: My dere chylde take hede how Trystam doo you tell. How many manere bestys of venery there were: Lysten to your dame and she shall you lere. Foure manere bestis of venere there are: The fyrste of theym is the harte: the seconde is the hare. The boore is one of tho: the wulfe and not one mo.

¶Bestys of the Chace

¶And where that ye come in playne or in place: I shall you tell whyche ben bestys of enchace: One of theym is the bucke: a nother is the doo: The foxe and the marteron: and the wylde roo. And ye shall my dere chylde other bestys all: Where so ye theym fynde Rascall ye shall them call. In fryth or in fell: or in the forest I you tell.

¶Note here the aege of an harte

¶And for to speke of the harte yf ye woll it lere: Ye shall hym a Calfe call at the fyrste yere. The seconde yere a Broket so shall ye hym call: The thyrde yere a Spayad lernyth thus all. The fourth yere a Stagge call hym by ony waye: The fyfth yere a grete Stagge your dame bydde you saye. ¶The syxte yere call hym an harte. Dooth soo my chylde whyles ye ben in quarte.

¶To knowe the heed of an Harte: and that is dyuers.

¶And of the horny that he thenne beryth abowte. The fyrste heed shall be Iugyd wythout. Therin fynden we suche dyuersyte. Netheles the syxt yere euermore at the leest. Thou shalt well Iuge the perche of the same beest. whan he hath auntelere wythout ony lette: Ryall and suryall also there I sette. And that in the toppe so whan ye maye hym ken: Thenne ye shall calle hym forchyd an harte of ten. And whan he hath in the toppe thre of the selue: Thenne ye shall calle hym trochyd an harte of twelue. And afterwarde in the toppe whan there foure bene: Thenne shall ye call hym sommyd an harte of syxtene. And from foure forwarde what so befall: Be he neuer of so many ye shall hym sommyd call. Ryght of the nombre euyn that he is: Callyth hym from foure sommyd Iwys. Also haue ye seele: an harte heeded weele /

¶An Herde. a Beue. a Sounder: a Rowte

¶My chylde callyth herdys of harte and of hynde: And of bucke and of doo where ye theym fynde. And a beue of rooes what place they ben. And a sounder ye shall of the wylde swyne: And a rowte of wulues where they passe in / So shall ye them call as many as they ben.

¶A Lytyll herde. a Myddyll herde. a Grete herde.

¶Twenty is a lytyll herde though it be of hyndys: And thre score is a myddyll herde to call hem by kyndis. And foure score is a grete herde call ye them soo: Be it harte be it hynde bucke or elles doo.

¶How ye shall saye a Grete harte: & not a Fayr and other

¶A grete harte whan ye hym se so shall ye hym call: But neuer a fayre harte for noo thynge that maye be fall. A grete hynde a grete bucke and a fayr doo: My sones where ye walke call ye theym soo. So ye sholde name suche dere: and doo as I you lere /

¶What is a Beuy of rooes grete or smalle.

¶And syxe is a beuy of rooes on a rowe: And ten is a myddyll beuy full well I it knowe. A grete beuy is twelue whan they togyder be: And so call them sones where that ye them se. The more nombre than ywys: the gretter the beuy is.

¶What is a Sounder of swyne grete or smalle

¶Twelue make a sounder of the wylde swyne: ••vi. a medyll sounder what place they ben in. A grete sourde of swyne .xx. ye shall call. Forgete not this lesson for no thynge that maye befall. Thynke what I saye: my sone nyght and daye.

¶Of the Roo huntynge: brekynge and dressynge.

¶Whan ye hunte at the roo then̄ ye shall saye thore: He crossyeth & tresonyth your hondes byfore: A grete roo bucke ye call hym not soo: But a fayr roo bucke and a fayr doo. Wyth the bowellys and wyth the blood: Rewarde ye your houndes my sones soo good. ¶And eche fote ye shall kytte in foure I you kenne: Take the bowelles & the blood and do all togyder thenne. Yeuyth it thenne to your houndes soo: And moche the gladder thenne they woll goo. That to your houndes a rewarde is namyd: For it is eten on the grounde & on the skynne dealyd. ¶The roo shall be herdelyd by venery I wene. The two forther legges the heed layed bytwene. And take one hynder legge vp I you praye: And that other forder legge ryght as I you saye: Vpon that other forder legge both ye theym pytte: And wyth that other forther legge vp ye theym knytte. On this manere thus whan ye haue wrought: All hole to the kechyn then̄ it shall be brought. Saue that your houndes ete: the bowelles & the fete.

¶Now of the aege & vndaynge of the boore

¶Now to speke of the boore the fyrste yere he is: A pygge of the sounder callyd as haue I blys. The seconde yere an hogge and soo shall he be: And an hoggestere whan he is of yeres thre.

And whan he is of foure yere a boore shall he be: From the sounder of the swyne thenne departyth he. A synguler is he soo▪ for alone he woll goo. ¶whan ye haue slayne the boore and woll doo hym ryght: Ye shall vndo hym vnflayne whan he shall be dyght. Thyrty bredys & two of hym ye shall make: By the lawe of venery I dare vndertake. Thrugh your houndys by strengthe yf that he be dede: They shall haue the bowelles boyllyd wyth the brede. Caste vpon the grounde there the boore was slayne: And that is callyd a rewarde soo hunters it sayne. Vpon the erthe soo haue I blys: for that soo eten is.

¶Now of the haare

¶Now for to speke or the haare my sones sykerly: That beest kynge shall be callyd of all venery. For all the fayr spekynge & blowynge that is thare: Comyth of sechynge and fyndynge of the hare. For my leyf chyldern I take it on honde: He is the merueyllou••t beest that is in ony londe. For he fymayeth and crotyth and roungeth euer more: And beeryth talowe and grees: and aboue teeth hath be fore And other whyle he is male: and soo ye shall hym fynde: And other whyle female and kyndlyth by kynde. ¶And whan he is female and kyndlyth hym wythin: In thre degrees he theym beryth or he wyth theym twyn̄. Two rough and two smothe who woll theym se: And two knottys also that kyndelys wyll be. whan he is female: soo tell I my tale.

¶The rewarde for houndes

¶whan your houndes by strengthe haue doon her to deed: The hunter shall rewarde theim wyth the heed. wyth the sholders & the sydes and wyth the bowelles all: And all thynge wythin the wombe saue oonly the gall. The paunche also: yeue theym none of tho. whyche rewarde whan on the erthe it is dealyd: wyth all good hunters the (Halow) it is namyd. Thenne the loynes of the haare loke ye not forgete: But brynge theym to the kechyn for the lordes mete.

And of this sayd beest to trete: here it shall be lete.

¶whyche beestes shall be flayne and whyche strypte.

¶Now to speke of the beestes whan they ben slayne: How many be strypte and how many be flayne. All that beere skynne and talowe & rounge leue me: Shall be flayne sauf the hare for he shall strypte be. And all that beryth grees: and pyles therupon: Euer shall be strypte whan they ben vndon. On this manere playe▪ thus ye shall saye.

¶whyche bestys shall be reryd wyth the Lymer.

¶My dere sones echoon now woll I you lere: How many manere beestys as wyth the lymere. Shall be vpreryd in fryth or in felde: Both the harte and the bucke and the boore so wylde. And all other bestes that huntyd shall be: Shall be sought and founde wyth Ratches so fre. Saye thus I you tolde: my chyldern so bolde.

¶The dyseryuynge of a bucke

¶And ye speke of y^e bucke the fyrste yere he is: A fawne soukynge on his dame say as I you wys: The seconde yere a Prycket the thyrde yere a Sowrell: A Soure at the fourth yere the trouth I you tell. The fyfth yere calle hym a Bucke of the fyrste hede. The syxte yere calle hym a Bucke and doo as I you rede.

¶Of the hornys of a bucke

¶The hornes of a grete bucke or he soo be: Must be sūmonyd as I saye herkenyth to me. Two braunches fyrste pawmyd he must haue: And foure auauncers the soth yf ye woll saue. And .xxiiij. espelers and thenne ye maye hym call: where so ye be a grete bucke I tell you all.

Of the Roobucke

¶And yf ye of the roobucke woll knowe the same: The fyrste yere he is a kydde soukynge on his dame. The seconde yere he is a gerle: and so ben suche all: The thyrde yere an hemule loke ye hym call. Roobucke of the fyrste heed he is at the fourth yere: The fyfth yere a Roobucke hym call I you lere.

At saynt Andrewes daye his hornes he woll caste: In moore or in moste he hydyth theym faste. Soo that noo man maye theym soone fynde: Elles in certayn he dooth not his kynde. ¶At saynt Iamys daye where soo he goo: Thenne shall the roobucke gendre wyth the roo. And soo boldly there as ye soionrne: Then̄ he is callyd a roobucke gooynge in his tourne. And yf ye maye a roobucke slee wythout ony fayle: And ye fynde that heuy grece at his tayle. As some roobuckes haue whan ye it fynde: Then̄ shall ye rere it as ye doo of harte and of hynde. Also the roobucke as it is well kyde: At holy Roode daye he gooth to ryde. And vsyth the byt: whan he maye gete it.

¶Now of the harte & of the hynde

¶Sones of the harte and the hynde lerne yet ye maye: There they drawe to the herde at holy Rode daye. To the stepe then̄ they goon: eche hote daye at noon̄. whyche stepe they vse my chyldern I you saye: Tyll it be Mydsomer at the leste waye. The cause of the stepe is to kepe hym fro the flye: who so comyth to that place maye it well spye. A nother thynge they vse my chylde also: The same season of the yere to soyle to go.

¶Of the cryenge of thyse bestys

¶An harte belowyth and a bucke groynyth I fynde: And eche roobucke certayn bellyth by kynde. The noyse of thyse bestys thus ye shall call: For pryde of theyr make they vse it all. Saye chylde where ye goo: your dame taught you so.

¶Merke well thyse seasons folowynge.

¶Tyme of grece begynnyth at Mydsomer daye: And tyll holy Rode daye lastyth as I you saye. ¶The season of the foxe fro the Natyuyte: Tyll the Annuncyacōn of our lady free. ¶Season of the roobucke at Ester shall begynne: And tyll Myghelmas lastyth night or she blynne.

¶The season of the roo begynnyth at Myghelmas: And it shall endure and laste vntyll Candylmas. ¶At Myghelmas begynnyth huntynge of the haare: And lastyth tyll Mydsomer there wyll no man it spare. ¶The season of the wulfe is in eche countre: At the season of the foxe and euer more shall be. ¶The season of the boore is from the Natyuyte: Tyll the puryficacōn of our lady soo fre. For at the Natyuyte of our lady swete: He maye fynde where he gooth vnder his fete. Bothe in wodes and feldes corne and other frute: whan he after foode makyth ony sute. Crabbes and oke cornes & nottes there they grow: Hawys and hepes and other thynges ynow. That tyll the Puryfycacōn lastyth as ye se: And makyth the boore in season to be. For whyle that fruyte maye laste: his tyme is neuer paste.

¶Of the huntynge of the haare

NOw to speke of the haare how all shall be wrought: whan she shall wyth houndes be founden and sought. The fyrst worde to the hoūdes y^t the hunte shall out pit Is at the kenell doore whan he openyth it. That all maye hym here: he shall saye (Arere) For his woundes wolde come to hastely: That is the fyrste worde my sone of venery. And whan he hath couplyd his houndes echoon: And is forth wyth theym to the felde goon. And whan he hath of caste his couples at wyll: Thenne shall he speke and saye his houndes tyll. (Hors de couple auaunt se auaunt) twyse soo: And thenne (So ho so ho) thryes and no moo. And then̄ saye (Sa cy auaunt So ho) I thou praye. And yf ye se your houndes haue good wyll to renne: And drawe awaywarde fro you saye as I you kenne. (H••rt how amy) agayn theym call soo:

Then̄ Sweff mon amy sweft) to make theym softe thoo. And yf ony fynde of the haare there he hath goo: And he hyght Rycharde or Bemounde to hym crye soo. Dyes a Bemounde le vaillant and I shall you auowe: Que quida troū la cowarde on la court cowe. That Bemounde the worthy wythout ony fayle: That wenyth to fynde the cowarde wyth the shorte tayle. ¶And yf ye se where the haare at pasture hath bene: Yf it be in the tyme of the corne grene. And yf your houndes chace well at your wyll: Then̄ thre motes shall ye blowe bothe lowde & shyll. There one and there a nother there he pasturyd hath: Then̄ saye (Illoques illoques) in the same path. So saye to theym in kynde: vnto tyme that ye her fynde. ¶And then̄ caste a sygne all the felde abowte: To se at her pasture where she hath be in or owte. Other at her fourme for gladly to be she is not not lefe: There she hath pasturyd in tyme of relefe. And ony hounde fynde or musynge of her mace: There as she hath be and is goon out of that place. (Ha cy touz cy est yll) soo shall ye saye: (Venez arer so how sa (also lowde as ye maye. (Sa cy ad est so how) after that: (Sa sa cy auaunt and therof be not lat. And whan ye se vnto the playne her at the laste: In felde or in erable londe or in to the wood paste. And your hounde woll fynde of her there then̄: Say (La douce amy la est a) and do as I you ken̄. That is to saye: swete frende there is he come low: For to dry here. and therwyth ye shall saye (So how). (Illoques ey douce ey vayllaunt so how so how then̄ twyse Thus maye ye now dere sones lerne of veneryce. And whan ye come there as ye trowe he woll dwell: And so semyth to you well: then̄ saye as I you tell. (La douce la est a venuz) for to dwell thore: And therwyth thryes (So how (saye ye no more. And yf it semyth well you to fynde all in fere: And wene so to doo then̄ saye Douce how here how here)

(How here douce how here how here) he syttyth: So shall ye saye my chyldren and for noo chynge lettyth. All manere beestes that euer chacyd be: Haue one manere of worde (So how) I tell the. To fulfyll or vnfyll eche manere of chaas: The hunte euer more in his mouth that worde he haas. And yf your houndes at a chace renne there ye hunte: And the beest begyn̄ to renne as hartes ben wonte. Or for to hanylon as dooth the foxe wyth his gyle: Or for to crosse as the roo dooth otherwhyle. Other dwell so: that your houndes can not out goo Then̄ shall ye saye (Hoo sa amy sa la) (A couples la arere so how) suche is the playe: And (So how) as moche is as (Sa how) to saye. But for (So how) is shorte in speche whan it is brought: Therfore saye we (So how (but Sa how)) ••aye we nought. And yf your houndes chace at harte or at the hare: And they renne at defawte thus ye shall there tare. (I cy so how assayne assayne stou hoho) (Sa assayne arere so how) thyse wordes and noo moo. And yf your houndes renne well at foxe or at doo: And soo faylle at defawte saye thus ferder or ye goo. (Ho ho ore swef aluy douce a luy) that they here: (Ho hoy assayne assayne sa arere) So how so how venez a coupler / and doo as I you ken̄: The more worshyp maye ye haue amonge all men. Your craftes lete not be hydde: and doo as I you bydde. All my sones in same: and thus maye ye knowe of game:

¶The boste that the mayster hunter makyth to his man now here folowynge ye maye here.

THe mayster to the man makyth his boste: That he knowyth by kynde what the harte coste. At huntynge euermore whan he gooth. Quod the man to his mayster that were good lore: For to knowe what he dooth the houndes before. what dooth he quod the mayster to the man.

He dooth quod he euyn as thou mayst se: (〈◊〉〈◊〉) and soo dooth noo beest but he. whan brekyth he quod the man what is that to saye: wyth his fete he openeth the erthe there he gooth awaye. what is the cause quod the man mayster I the praye: That the harte before the houndes whan they hym hunte aye, That thenne to the ryuer he wyllyth for to goo: Quod the mayster to the man there are causes two.

¶For two 〈◊〉〈◊〉 the harte desyreth to the ryuer. And ••o••e w•••• ••••y••••e termes folowynge Descende & other.

¶Oone cause for the ryuer Descende he is ay: And soo he is to the water whan he takyth the way. why callyst thou hym (Descende) mayster I the praye: For he peyryth of his myght the sothe I the saye. A nother is to the water why he gooth other whyle: The houndes that hym sewen to purpose to begyle. ¶Yet of this harte quod his man mayster I wolde ken̄: In to the water whan he lepyth what he makyth then̄. He proferyth quod the mayster and so ye shall saye: For he wote not hymself yet how he woll awaye. whether ouer the water he woll forpas. Or torne ayen the same waye there he fyrste was. Therfore it is (Profce) as thyse hunters sayne. And (Reprofce) yf the same waye he torne agayne. At that other syde of the water yf he vp sterte: Then̄ shall ye call it the (Soule) of the harte. And that is for the water of his legges wete: Downe in to the steppes there fallen of his fete. Ayen the water his waye euen yf he hent: Then̄ brekyth he water therto take you tent. And yf wyth the water goo algate you it shall: (Defoulaunt) the water an herte soo hym call.

¶Now of the Nomblys merke well the termes.

¶The man to his mayster spekyth full blyth: Of the nombles of the harte that he wolde hym hyth. How many endes there shall be theym wythinne: Quod the mayster but one thycke nor thynne. And that is but the (Gargylyon) to speke of all by dene:

And all thise other (Crokes) & (Roundelles) bene.

¶The Auauncers. the Forchers.

¶Yet wolde I wyte and thou woldest me lere The crokes & the roundelles of the nombles of the dere. One croke of the nombles lyeth euermore: Vnder the throte bolle of the beest before. That callyd is (Auauncers) who so can theym ken̄: And the hyndermest parte of the nombles then̄. That is to saye the (Forchers) that lyen euen betwene: The two thyes of the beste that other crokys euene. In the mydref that callyd is the roundell also: For the sydes rounde abowte coruen it is fro. My dere sones bolde: saye of game I thus you tolde. ¶Yet wolde I wyte mayster why thyse houndes all: Bayen & cryen whan they hym seche shall. For they wolde haue helpe that is theyr skyll: For to slee the beest that they renne tyll. ¶Tell me mayster quod the man what is the skyll: why the haare wolde so fayne renne ayenst the hyll. Quod the mayster for her legges be shorter before: Than behynde that is the skyll thore. ¶what is the cause quod the man that men̄ saye of that beste: That the haare syttyth ay whan she takyth her reste. And other bestes lye as comynly men sayne: For two causes quod the mayster I tell the playne. One is for she hurclys vpon her houghes ay: And all other bestes can the syde to the groude lay. A nother cause there is and that is noo lees: For she beeryth bothe sewet and pure grees. ¶Yet wolde I mayster quod the man fayne wyte more: where lyeth the suet of the hare behynde or before. Ouer the loyne quod the mayster of eche hare thou take: Bytwyxe the tayle & the chynne euen on the backe. ¶Yet wolde I mayster quod the man thyse at the lere: whan thou walkest in the felde wyth thy lymere. There as an harte pasturyd hath or that thou hym se: To knowe fatte or lene whether that he be. I can quod the mayster well tell the this caas:

wayte well where he laye: & where he fumeyed haas. Yolowe and englaymyd yf that it be: Then̄ he is fatte I the tell lerne thyse of me. And yf it be bothe blacke & harde and clene: Then̄ he is meegre larbre and lene. And of this same thynge yf thou leue not me: Take hede in the wynter and thenne thou maye it se. ¶Yet mayster of the hare fayne wolde I wyte more: what he doth whan he gooth the houndes before. He Sorth & Resorth there he gooth awaye: Pryckyth & Repryckyth the soth for to saye. But what is that quod the man whan they so done: That shall I quod the mayster tell the full soone. In the feldes where he gooth noo wayes ben: There he sorth whan he steppyth and it maye not be seen. And after whan he dowblyth and tornyth agayne: Then̄ he resorth as good hunters sayne. And whan he rennyth in the waye drye or wete: Thenne men maye fynde Fostalx of clees or of fete. That Pryckyth the hare ay whan he doth soo: And Repryckyth thenne yf he agayne goo.

¶A Vauntelay. a Laye. and a Relaye.

¶Mayster yet quod the man what is this to saye That shall I tell the quod he: for a lytyll byzete: whan the houndes are sette an harte for to mete. And other hym chasen and folowen to take: Then̄ all the (Relays) thou maye vpon them make. Euen at his comynge yf thou lete thy houndes go: whyle the other that be behynde ferre arn̄ hym fro. That is (Auauntelay) and so thou shalt it call: For they are then̄ ferre before those other houndes all. And an hyndrynge grete all other vntyll: For they maye not that daye no more sewe at wyll. And holde thy houndes styll yf that thou so do: Tyll all the houndes that be behynde be come therunto. Then̄ lete thy houndes al togyder goo: That callyd is an (Allay) and loke thou saye soo. And that hyndrynge is yet to theym that ben behynde: For the restyd woll ouergoo the wery by kynde.

A Relay is after whan the houndes are poste: Ferre before wyth the harte that hyeth them faste. To lete thy houndes ferre after theym goon: And that is thenne a fortherynge to theym echoon. For and thyn houndes haue ouertake thyse other by dystres: Then̄ shall they all folowe hym of one swyfnes.

¶what is a forloynge.

¶Yet mayster wolde I fayne thus at you lere: what is a forloynge for that is good to here. That shall I say the quod he the soth at leest: whan thy houndes in the wood seche ony beest. And the beest is stoll awaye out of the fryth: Or the houndes y^t thou haste meten therwyth. And ony other houndes before: than maye wyth theym mete: Thyse other houndes are then̄ forloynyd I the hete. For the beest and the houndes are soo ferre before: And the houndes behynde ben wery and sore. So that they maye not at the beest come at theyr wyll The houndes before forloyne theym and that is the skyll. They ben ay soo ferre before to me yf thou wylt trust: And this is the forloyne lere it yf thou lust.

¶whyche thre thynges causyth the houndes to endure.

¶Yet wolde I wyte mayster yf it were thy wyll: whan thy houndes renne an harte vntyll. And ay the ferder they goo the gladder they ben: For thre causes quod he ofte tymes is sen̄. One is whan the harte rennyth faste on a rees: He swetyth that it renneth downe thrugh out his clees. The houndes whan they fynde of that it is swete: Thenne are they leuer to renne and lother to lete. A nother cause whan the harte nye nomore maye: Then̄ woll he whyte froth caste there he gooth awaye. whan thy houndes fynde of that then̄ are they gladde: In hope they shall him haue and renne so radde. The thyrde cause is of the harte whan he is nyghe dede: Then̄ he castyth out of his mouth froth and blood rede. The houndes knowe that he shall be take soone thenne: And euer the ferder they goo the gladder they renne.

Thyse are the causes thre: that causyth theym gladde to be:

¶whyche beest a slowe hounde takyth as soone as a swyft

¶what beest yet mayster I axe it for none yll: That moost hoole all houndes renne vntyll. And also soone the slowest shall hym ouer take. As the swyftyst shall doo what waye so euer he take. That beest a bausyn hyght: a brok or a graye: Thyse thre names he hath the soth for to saye. And this is cause therof: for he woll by kynde: Go thrugh thornes awaye the thyckest he maye fynde. There as the swyftest houndes maye noo ferder go: Then̄ the slowest of fote be he neuer so thro.

¶why the haare Fumays & Croteys

¶Yet mayster wolde I wyte why that men sayn: That the haare fumays and croteys bothe playn. And all other manere bestes that huntyd be: Femyon̄ or Fenon̄ as we well it se. That shall I well tell the quod the mayster thenne: For why that he fumays and croteys well I kenne. He femayth for he beryth talowe this is noo lees: And he croteys men sayen for he beryth noo grees. And roukys on his houghes whan he lettyth it goo: And bestes of suche kynde fynde we no moo. ¶How many bestes Femayen̄ mayster fayne I wolde lere: And how many Fenon̄ that were good to here. All this to tell quod the mayster I holde it but lyght: All bestes that beere talowe and stonde vpryght. Femayen̄ whan they do say as I the kenne: And all other Fenon̄ that rowken downe thenne.

¶How many manere bestys of Venery releue

¶How many manere beestys yet mayster me tell Of venery releuen by fryth or by fell. To this quod the mayster I shall the answare: Of all bestys but two the harte and the hare. From the Annunciacōn of our lady daye: The harte then̄ releuyth the sothe for to saye. Tyll saynt Peters daye & Poul and the hare right: From the Puryfycacōn of our lady bryght.

Tyll the Translacōn releuyth leue ye me: Of saynt Thomas tyde of Caunterbure.

¶To vndo the wylde boore.

¶Yet my chylde of the boore for to speke more: whan he shall be vndoon I tell you before. Two & thyrty bredes ye shall of hym make: Now wyll you my sones wyte where ye shall theym take. The fyrste of theym is the heed what euer befall: A nother is the colere and soo ye shall it call. The sheldes on the sholders therof shall two be: Thenne eyther syde of the swyne departed in thre. The pestelles & the gambons departe theym two: And two felettes he hath forgete not tho. Thenne take his legges & his fete & shewe your sleyght: For they shall of his bredes be countyd for eyght. Departe the chyne in foure peces and noo mo: And take there your bredes thyrty and two. And fayr put the grece whan it is take awaye: In the bledder of the boore my chylde I you praye. For it is a medycyne: for many manere pyne.

¶How ye shall breke an harte

¶And for to speke of the harte whyle we thynke on: My chylde fyrste ye shall hym serue whan he shall be vndon̄: And that is for to saye or euer ye hym dyght: wythin his hornes to laye hym vpryght. At thessay kytte hym that lordes maye se: Anone fatte or lene whether that he be. Then̄ kytte of the coddes the bely euen fro: Or ye begyn̄ hym to flee: and thenne shall ye go. At chaulys to begyn assone as ye maye: And slytte hym downe euyn to thassaye. And fro the assaye euyn downe to the bele shall ye slytte: To the pyssyll there the codde was awaye kytte. Then̄ slytte the lyfte legge euen fyrst before: And then̄ the lyfte legge behynde or ye do more. And thyse other legges vpon the ryght syde: Vpon the same manere slytte ye that tyde. To goo to the chekes loke that ye be prest:

And soo flee hym downe euyn to the breste. And soo flee hym forth ryght vnto thessay: Euen to the place where the codde was kytte away. Thenne flee the same wyse all that other syde: But lete the taylle of the beest styll theron byde. Then̄ shall ye hym vndo my chylde I you rede: Ryght vpon his owne skynne & laye it on brede. Take hede of the kyttynge of the same dere: And begyn̄ fyrste to make the Erbere. Then̄ take out the sholders: and slyttyth anone: The bely to the syde from the corbyn bone. That is corbyns fee: at the deth he woll be: Then̄ take out the sewett that it be not lafte: For that my chylde is good for leche crafte. Then̄ put thyn honde loftly vnder the breste bone: And there shall ye take out therber anone. Then̄ put out the paunche / and from the paunche taas: Awaye lyghtly the Rate suche as he haas. Hoole it wyth a fyngre. doo as I you ken̄: And wyth the blood and the grece fyll it then̄. Loke threde that ye haue and nedyll therto: For to sewe it wyth all or ye more do. The smalle guttes then̄ ye shall out pyt: From theim take the mawe: for yete not it. Then̄ take out the lyuer and laye it on the skynne: And after that the bledder wythout more dynne. Then̄ dresse the nombles: fyrst that ye recke: Downe the anauncers kerue that cleuyth to the necke. And downe wyth the bolthrote put theym anone: And kerue vp the flesshe there vp to the hach bone. And soo forth the fyllittes that ye vp arere: That fallyth to the nombles: and shall be there. wyth the nerys also and sewit that there is: Euen to the mydryf that vpon hym is. Then̄ take downe the mydryf from the sydes hote: And haue vp the nombles hole by the bolle throte. In thyn honde thenne theym holde. and loke and se: That all that longyth theym to: togyder that they be.

Then̄ take theym to thy broder to holde for tryst: whyles thou theym dowblest & dresse as the lyste. Then̄ awaye the lyghtis / and on the skynne theym laye: To abyde the querre my chylde I you praye. Then̄ shall ye slytte the slough there as the herte lyeth: And take awaye the heres from it and by slyeth. For suche heeres hath his herte: ay it vpon: As men maye se in the beest whan he is vndon. And in the myddes of the herte a bone shall ye fynde: Loke ye yeue it to a lorde. and chylde be kynde. For it is kynde for many maladies: And in the myddes of the herte euer more it lyes. Then̄ shall ye kytte the skyrtes the teeth euyn fro: And after the ragge boon kyttyth euyn also. The forchis: and the sydes euyn bytwene: And loke that your knyues ay whettyd bene: Then̄ turne vp the forchis. and frote theym wyth blood: For to saue the grece. so doo men of good. Then̄ shall ye kytte the necke the sydes euyn fro: And the heed fro the necke kyttyth also. The tonge the brayne the paunche and the necke: whan they wasshe ben well wyth water of the becke. The smalle guttes to the lyghtis in the derys: Aboue the herte of the beest whan thou theym rerys. wyth all the blood that ye maye gete and wynne: All togyder shall be take. and layed on the skynne. To gyue your houndes. that callyd is ywys: The quyrre. aboue the skynne for it eten is. And who dressyth hym so by my counsayle: Shall haue the lefte sholder for his trauayle. And the ryght sholder where so euer he bee. Yeuyth to the foster for that is his fee. And the lyuer also of the same beest: To the fosters knaue yeuyth at the leest. The nombles truste in the skynne. & hardyll theym faste: The sydes & the forches togyder that they laste. wyth the hynder legges. be doon so it shall: Then̄ brynge it home. and the skynne wyth all.

The nombles. & the hornes. at the lordis yate: Then̄ boldly blowe the pryce. ther ate. Your playe for to mynne: or that ye come inne.

¶Explicit dame Iulyans Bernes doc∣tryne in her boke of huntynge.