¶This is the manere to begyn̄ to kepe hawkes / but not all manere hawkes: but on̄ly goshawkes & tercellis of goshawkys and spare hawkes / and in what manere they shall be take.
¶The manere to speke of hawkes fro an egge tyll they ben able to be taken.
FOR to speke of Hawkes / Fyrste they ben egges And afterwarde they ben dysclosed hawkys. And comynly goshawkis ben disclosyd assoone as the chough{is} and in some place more tymely after the countree is of hete & tymely bredynge. ¶And we shall saye that hawkis done: eyer: and not brede in the woodes. ¶And we shall saye that hawkis done: drawe: whan they beere tymberyng to theyr nestis / and not they: buylde: ne make their nestis: ¶And in the tyme of their loue they: calle: and not: cau∣ke: ¶And we shall saye that they: treede:. ¶And whan they ben vnclosyd and begyn̄ to feder ony thynge of lengthe: anone by kynde they woll drawe somwhat oute of the neste: & drawe to bowes and come ayen to theyr neste. And thenne they ben cal∣lyd: bowesses:. ¶And after saynt Margarytes daye they wyll fle fro tree to tree. And then̄e they ben callyd: braunchers:. And thenne it is tyme for to take theym. ¶And .vij. nyghtes before saynt Margarites daye and .vij. nyghtes after: is beste takyng of spare hawkis.