In parthos after he toke possession
Thus yonge herodes of volunte and pride
Gan a werre ageyn them of rome toun
Whom to withstande they list nat longe abyde
The consull Crassus cam doun to their syde
Cōmaunded was shorte processe for to make
Towarde parthois his viage for to ta••e
Crassus list nat tentre in that reame
Left parthos the story doth deuyse
Toke his way towarde Ierusalem
To take there a solempne empryse
In the temple only of couetise
Toke ther ageyne the title of rightwisnesse
Vp all their tresour and their great richesse
By which he gate in dyuerse regions
Greate multytude to holde vp his {per}tye
Led with him eleuene legions
Towarde parthoys faste gan him hye
By his lettres proudly gan diffye
The seide Herodes and with greate apparayle
Myd his cuntre profryd him batayle
The next morowe whan crassus toke the felde
To him was brought of blacke a cote a••mure
Which whan his knightis auisely behelde
Dempt it a tokne of disconfiture
For in contraire romayns do their cure
Whan their capteyn shall feight or the hede
His cote armure is outher white or rede
A Nother tokne frowarde to beholde
The first Egle bete in his banere
Also sone as men dyd it vnfolde
Contrariously he turnyd loke and chere
The bak to Cras••us folke sawe that stode nere
A pronostyk to romayns full certeyne
Howe fortune to them was that day ageyne
By the flode passynge of Eustrates
With vnware tempestes his standardis euerichone
In to the ryuere were caste amonge the prees
To rekne them all vpright stode nat one
Wherof astonyed they wolde no ferther gone
These pronostikes made theym so afrayed
Lyke men in herte dispeyred and dismayed
Of these toknes crassus was recheles
The pronostikes also he dyd despise
Toke vpon him to passe Eufrates
To entre parthoys only for couetyse
To whom herodes sendeth in this ••ase
That his comynge was more for pillage
Than for knighthode manhode or corage
All the power of parthoys tho cam doun
With many prefect and many greate cunstable
Ageyne crassus and them of rome toun
Which as I tolde abode on their pillage
That turned after to their great damage
The sonne of Crassus slayne in that fray
His fader take and all vpon a day
His hedesmyt of in whom was no diffence
And disconfyted with many legion
The hede of crassus brought to the presence
Of herodes within his royall toun
Which hath commaunded golde to be brought doun
To be molte there as he lay dede
And to poure therof full his hede
This thinge was done for a mockerye
In sygne only the storye doth deuyse
That golde nor tresour vpon no partye
Staunche might his thurst of couetise
Such gredynesse eche man shulde despise
For auaryce of custum in eche place
Of hye prowesse doth the pris difface
Herodes after dyd serch all the wardys
Thrugh all the feeld vpon Crassus side
Toke the penouns baners and standardys
And in his temples large longe and wyde
Lete hang•• theym vp of surquedye and pryde
In signe only and eke for a memorye
He of romayns hath gete the victorye
With which he lyst nat only be content
Wenynge his fortune shuld abyde stable
In to surrye he hath his sonne sent
Called pachorus made him a cōstable
Of that region with him to be {per}table
Of all tresours and meobles that he fonde
Whereuer that he rode throughout all the londe
This parchorus by his chiualrye
Encres gan in his tendre age
Wherof herodes his fader had enuye
Feerfull it shulde turne to his damage
Lest he wolde by tytle of heritage
Maugre him at his ageyn comynge
Take vpon him of parthos to be kinge