Which of purpos dyd his deth prouyde
By many vncouth straunge occasion
In tendre youth first they made him ride
Vpon an horse wylder than a lyon
Of purpos only for his destruccion
But albe so that he was yonge of age
The horse he rulyd in all his moste rage
Nat of doctryne but only of nature
He was disposed cūnyngly to ryde
Ouer him the maystry to recure
Maugre the horse of wyt he was his guyde
What way he toke frowarde or asyde
He dauntyd him that where so euer he rode
Brydlyd him and on his bak he bode
His owne kyn and his next alyes
Moste laboured to brynge him to mischeef
With venymous drinke set on him espyes
At gode leiser as doth a couert theef
Of their fell poyson for to make a preef
In their entent this is well couth
Him to murdre in his tendre youth
But whan that he apperceyued their treson
To saue him silf made great ordynaunce
Anon as he gan haue suspecion
Of their vnkindly hatefull purueaunce
For remedyes made cheuysaunce
Was prouyded their malice to declyne
By many notable prouyd medecyne
And their malice prudently to eschue
Is remembred while he was yonge of age
With certeyne frendys which that dyd him sue
He disposed of custum his corage
To hunte and chace beestys moost sauage
Vnder that coloure he dyd it for a wyle
Ferre fro his cuntre absente him for awhile
Of one corage one herte and one chere
Suffred manly toke none heuynesse
In desertys space of seuene yere
Amonge hye hyllys bode in wyldrenesse
Set in asia the storye berith wytnesse
Fonde no lodgynge trasynge the cuntrees
Saue in kauernys and greate holowe trees
The boke remembreth howe that his dyete
Were beestys wylde enchaced with greate might
Fled Idelnesse eschued all quiete
And yltyll slepe suffised him at night
By excercise his body was made light
There was nouther whan him list pursue
Herte nor hynde that might his honde eschue
He nouther drad tygres nor lyons
He was so swyst though they dyd him assayle
Lyke of strength to old champions
No wylde beste of great nor small entrayle
To escape his honde might nat countreuayle
If he were ware erly outher late
So greate swyftnesse had ••••tridate
Amonge he had in armys excercise
Amonge to tournay and ren on horsbacke
All delycate fare he dyd also despyse
Of gredy excesse in him there was no lak
A nightertyme his slepe full oft he brake
Stoundemele the houres for to marke
In the dawnynge ros vp or the larke
The space accomplisshed fully of seuene yere
He is repayred home to his cuntre
Shewyd him silf of manhode and of chere
Full like a knight his story who list se
Wherof hys enmyes astonyed be
Caught of his cūmynge in herte a manere drede
Supposynge afore that he was dede
In whoos absence his wif leodices
Conueyed a childe as made is mencion
For the diffame shulde nat cūme in prees
Him for to murdre she sought occasion
Fully in purpos to sle him by poyson
Of which diffautys hir lorde was no thinge fayne
Knowynge the trouth made hir to be slayne
Toke on him after many knightly dede
First to conquere all Pafflogonye
By the helpe of worthy Nychomede
That tyme called kynge of bythynye
Togydre assured to be of one alye
In losse or lucre fortune to be their guyde
And therto sworne neuer to deuyde
To metridate legates were doun sente
Fro the romayns him lowly requeringe
That he wolde lyke to their entent
Pafflogonye restore to their kinge
Which he had wonne the cite assaylyng
But he list nat aduertyse their prayere
Nor on no {per}tyes their requestys here