It was eke tolde by their dyuynours
Howe pompeyus was lyke to haue a fall
And howe thestate of romayn emperours
With their triumphes that be Imperiall
At Iuluis first begynne shall
And after him thestate shall forth procede
By election or lynyall kynrede
To withstonde the power of cesar
Which towarde rome toke his wey right
Pompeye was sent wis manly and right war
But whan he herde tell of the might
Of Iulius he toke him to the flight
Eke all the senatours with him dyd fle
Towarde Epyre in grece a stronge cyte
Pompeie was olde famous in chiualrye
Cesar but yonge hardy for to assayle
Vpon the pleyns of grece and thessalye
Pompeye and he had a greate batayle
Geyn Iulius swerde no romayn might auayle
Constreyned of force the felde to forsake
Towarde Egipt they haue the wey take
Pompeye through cypre cam to Tholome
By a greate water at paphus dyd arryue
On the stronde there he dyd se
A stately place and vp he went blyue
The name of which pleinly to descryue
Cacobasile the cuntre dyd it call
Of which name the fortune is thus fall
The name tokneth of frowarde arriuayle
Sownynge in grete vnhappy auenture
By which the trust of pompeye dyd fayle
Fyll in despeire might it nat recure
Forsoke that Ile dyd his besy cure
To take a ship so by the se saylynge
Towarde Egipt where tholome was kinge
Of trust he fled to this tholome
In hope he sholde fynde in him socoure
Fayre chere shewed vndre duplicite
Fayled at the poynt gaue him feynt fauoure
Albe pompeye by his frendly laboure
Crowned him kynge in Egipt as I fynde
To whom ageyn he was fals and vnkynde
To mete pompeye he lete stuf a barge
By a maner pretence of frendlyhede
Gaue his menye that were there in charge
To mordre pompeie byhight them a great mede
Tweyne there were that bare to him hatrede
And in the vessell with sharpe swerdys whet
Or he was ware of his hede they smet
That one of theym was callyd achyllas
And his felowe named was fotyne
Toke vp the hede of that prince alas
Famous in knighthode borne of gentyl lyne
Amonge romayns as auctours determyne
Bolde in his tyme if men do him right
Through all the worlde one the best knight
Thus erthely princys with al their pompous fame
Which through all the worlde yeueth so greate a soun
Of slaughtre and mordre they toke first their name
By fals rauyne and extorcion
Clambe vp first so to domynacion
Brennynge of cuntrees conquest by violence
Set them in chayres of worldly excellence
In this batayle that called was ciuyle
Holde atwene pompeye and cesar Iulius
Thre hundryd thousand slayne within a whyle
Thre thousande take the storye telleth thus
Without princis notable and glorious
As kinges pretours reknyd all atonys
Trybunys consulys and centuryonys
Phebus on the soyle might nat his bemys sprede
Nor on the grounde shewe out his clere light
Men that were slayne lay so thycke on brede
That of the erth noman had a sight
Wulues berys rauynous foules of flight
Cam great plente to fede them there eche day
Besyde the ryuere of Nyle where they lay
Gobettys of flessh which foulys dyd arare
Fro dede bodyes borne vp in the ayre
Fyll fro their clees vpon Iulius face
Amyd the feeld where he had repayre
Made his visage blody and nat fayre
Albe that he to his encreas of glorye
Had thilke day of romayns the victorye
The hede of pompeye brought with his statly ring
Offred vp to Iulius hye presence
He by compassion the murdre aduertysynge
Of his Innat imperiall excellence
Brast out to wepe and in his aduertence
Thought greate pyte a prince of so great might
Shulde so be slayne that was so gode a knight