Howe Bitynctus kinge of auergnatus / by the Ro¦mayns was taken and dyed in pryson
BItynctus next of Auergnatis kynge
Cam tofore bochas gynnynge his cōpleint
Of his distresse thordre rehersinge
And howe that he was made feble & feynte
Agayn the romayns mischeuously atteynt
Nat withstondynge to mayntene his quarell
He cast of pride ageyne them to rebell
But it is first put in remembraunce
Howe Auergnatis is a nacion
Hangynge on gaule longeth vnto fraunce
Of which Bytinct stode in possession
Hauynge despight in his opynion
To the romayns any wyse to obey
But proudly cast agayn them to werrey
His laboure was to stonde in fraunchise
And be at large from their subiection
Gan of pride their lordship to despise
Gadred people of presumpcion
Whom for to mete fabius was sente doun
A mighty consull which knightly toke on honde
For that party Bytinctus to withstonde
Of whoos comynge bytinctus toke disdeyne
Bycause the folke which fabyus dyd lede
Were but fewe and whan he hath them seyne
He saide of scorne this people who taketh hede
May nat suffise myn houndys for to fede
Whan they be slayne to fewe they be in noumbre
With multitude that I shall them encoumbre
An hundryd thousande in his vauwarde he had
That passe shuld of auuernere the ryuere
And foure score thousande besyde that he lad
The consull fabius met him with gode chere
Whan he was passyd of rodamus the daungere
Faught all the day tyll it drewe to night
The romayns wan their soon were put to flight
At the Ryuere lyke as seith the boke
There were drownyd and brough to myschaunce
Fyfty thousande as they the water toke
Thrugh fortunes frowarde variaunce
And by atreyne tencres of his greuaunce
Bitinc••us take was of the romeyns
Dampned to pryson there to dye in cheyns