Howe the duke philopomones was take put in pry∣son after dranke poyson and so dyed.
AFter the processe of these two scipions
Twene two peoples wilfull and recheles
Began in grece newe dissencions
Twene Acheois and Etholois doutles
And a greate duke Philopomones
A prynce that tyme of full great puissaunce
Had of Messoneis holy the gouernaunce
This sayde prince philopomones
L••dynge his oost vpon afull fayre pleyne
As he rode armyd and put him silf in prees
Myd his people as gouernoure and wardeyne
Folke oute of rule for to call ageyne
Vpon his stede as he gan theym fette
In due ordre his wardes for to sette
And these princys of porte moste marciall
In the pursuit which that he gan make
Amonge his enmyes he had a sodeyn fall
Voyde of all rescus vnwarly he was take
Of all his frendys lyke a man forsake
Amonge his enmyes brought into pryson
There made an ende by drynkynge of poyson
Of philopomones this was the fatall cas
Oute of gouernaunce his peple disolate
Except a capteyn called ligorias
Which in the werres was wondre fortunat
Of acheoys toke on him thestate
Theym to gouerne and the people lede
Of him nomore in bochas I do rede