And all the children by succession
Had by discent borne of his lynage
Prynte of an ankyr as made is mencion
The fourth boke with all the surplusage
Of other toknes there told playne langage
And of the seyde fame Selenchus
Cam by discente the seyd antiochus
Whoos herte was sette of hye couetyse
To folowe his lustys and dilectacion
And specially he cast gan and deuise
To wynne in grece dyuers regions
And of the peple he caught occasions
By their fauoure to conquere their cuntre
And rebbell ageyne rome the cyte
With multitude and great apparayle
He gate in grece castelles and eke touns
Longynge to rome conqueryd by batayle
Toke vpon him in his presumpcions
Falsly to folowe the inclinacions
Of his byrth while he dyd abyde
In a cyte that callyd was Talcide
For cause of slouth he lefte his chiualrye
Forsoke mars and toke him to capide
Restynge the wynter he spent in lecherye
In wetch and ryot chase venus to hys guyde
Sensualite made reson stonde asyde
And by these menys for shorte conclusion
He was conueyed to his destruction
And whan that wynter with his frostys colde
Passyd was and all his stormes kene
In riot spent and wastyd as I tolde
And veer cam in with his newe grene
And fressh flora which is of floures quene
Of custom gynneth hir motles out dresse
In which ceson as auctours all expresse
Kynges princis with marciall apparayle
Tyme whan phebus in the ram doth shyne
They them dispose to go out to batayle
For excercise of marcyall disciplyne
And doun from rome expert in that doctryne
Descended is marchus actilius
Ageyne this vicious proude antiochus
This noble marke preuyd in armys wele
Which in his tyme was so gode a knight
With all his oste armed in bright stele
Ageyn antiochus cam to the feeld doun right
Vpon a morowe whan phebus shone full bright
Set his wardeyns by capteyns that he ches
Vpon a hyll called termophiles
Antiochus vpon that other syde
Whom glotonye and riot dyd oppresse
And drunken bachus which with him dyd abyde
With morpheus wyf of slombyr cheef goddes
Which caused him through slouth and Idelnesse
That prouidence oute of his court was gone
Causynge that day the slaughter of many one
Whan the Consull marchus the worthy
His aduersaries proudly gan assayle
They vnpuruayed toke them to the flight
Disareyed they might nat auayle
Thus antiochus fled oute of batayle
For ageyne romayns he might nat endur
Therfore on him fyll the disconfiture
Thus rebukyd fled to Ephesie
Ferre in Grece and there to dwell he ches
Sent to romaynes a great ambassatrye
With the seyde marchus for to trete of pe••
But in this ambasset this very doutles
Whan they atteyned of Marchus the presence
Were refused and had none audience
Of which antiochus greatly was ashamyd
Cast ageyne rome of hate and enmyte
To reyse a power and hath of newe attamyd
To gadre shippes and make a great arme
Gynne a werre ageyn them on the see
Hauynge an hope vnder a cowarde drede
Better on the water than on the londe to spede
Made his shippes be stuffed with vitayle
And his capteynes hath the londe forsake
But whan the romayns of newe gan him assayle
His shippes brent and all his stuf was take
And lyke myn auctour compendyously doth make
Thyse on the se the romaynes werraynge
He was outrayed the story witnessinge
¶Yit eft ageyne to his confusion
Vpon the londe he gan make him stronge
Met with cornelie called scipion
With waynes cartes made for the werre stornge
Shod with harde yron sharpe sithes set amonge
In trauers wise by greate ordenaunce
But for all that he was brought to mischaunce