Page [unnumbered]
Here bochas writeth in part ayenst such as can nat be content with suffisaunce but vsurpe to hygh dig¦nitees
HEre Iohn bochas calleth to memorye
The straunge Salaire the famous guerdoū
Of theym that gate by conquest and victorie
Honoure and triumphe within rome toū
Howe it was vsed he maketh mencion
Ceriously reherceth the manere
Which I shall write if ye list to here
A vise was take first of estatis thre
Of men of armys which that were present
That sawe in dede the magnanymyte
Of him that shall haue it by iugement
Of the clergye they must haue eke assent
And of the Senat and people moost notable
By preef soughtoute that he were founde able
This prince also outher the capteyne
Which shall the triumphe receyue of very right
Within a charefull richely beseyne
He shalbe set of golde boornyd bryght
Fret with stonys which shall yeue a light
As phebus doth in his mydday spere
That no derkenesse aboute him shall appere
This heuenly chare shall for more delite
To shewe thencres of his knightly glorye
Be led and drawe with foure stedys white
Through the cite in tokyn of his victorye
And he shall haue for a singuler memorye
In his right hande a palme of golde full shene
And on his hede a crowne of laurer grene
He shall eke haue aboue all his armure
Poudryd with palmys a cote of purpyll rede
In his lefthande his quarels for to assure
A standard rounde declaringe his manhode
And all aboue set vpon the hede
The princes armys full rich of apparayle
In whoos quarell he accomplisshed in batayle
And of custum the seyde standerd shall
Be richely depent with rede coloure
And so this knight this man moost marciall
Shall be conueyed lyke a conqueroure
And yit for more encres of his honoure
Vpon their fete his prysoners euerichon
Take by his manhode aboute his chare shall gone
The moost worthy fast by his syde
All the remenaunt after on him lokynge
Echon of the poetys which in the toun abide
Shall on him waite at his home comynge
Dytees deuise and of his conquest singe
And straunge mynstrellys to be also recorde
Their instrumentis shall touche at a corde
All of entent to yeue him more corage
To the capitoyle so he shalbe brought
And list of pryde he fall in none outrage
Nor surquedye within his owne thought
The moost wretch shall of the toun be sought
Which of custum shall haue a staf on honde
And in the chare behinde his backe vp stonde
Gnotos Eolitos in Greke he shulde seyne
Which in oure tunge pleynly doth expresse
Knowe thy silf remembrynge in certeyne
Vpon fortunys frowarde doublenesse
On whom thou trust may be no sekyrnesse
And who that douteth where that it be thus
Lat him remembre the ende of maulius
What auailed his triumphes or his byes
Crownys of golde and peerlyd fressh tunycles
His high prowe or all his chyualryes
Synguler feightinge or marciall {per}ticles
Newly remembryd or red i••olde cronicles
Peise his merites and see ••••••we at the last
Howe into tybre their champyon they cast
To his excuse auayled neueradell
Fauour of comons carectis of his woundys
Nor to the goddys his lamentable appel
Nor remembraunce of their fraunchised boundys
Teritories nor wynnynge of the groundys
Which that he wan with spendynge of his blode
All knyt in one to him to stede they stode
Here ye may se howe fortune sodenly
Cleernesse of fame can chaunge to derkenesse
Glorye to reproche worship to vylanye
And ioy passyd to mortall heuynesse
Swetnesse of sauoure into bitternesse
And sobirnesse into furious rage
And olde fraunchise to thraldom and saruage