Howe the prince Belgius was disconfited / and brought vnto nought
AFter this tyraunt as ye haue herde the cas
Slayne in batayle this traytoure odious
Anon in ordre cam to Iohn Bochas
A mighty prynce called Belgius
Dedly pale with fa••e furious
Which compleynyd amonge this wofull prees
His disconfiture done by quene sostenes
This sodeyne mischeef greuyd his herte sore
For all the folke that were in his batayle
Were put to flight bochas write nomore
Of his knighthode nor of his apparayle
Saue only this he maketh rehersayle
Of the french host he telleth in certeyne
Howe he was chosyn for a cheef capteyne
And howe he cam into the rich londe
Of macedoyne with his peple of fraunce
Tyll Sostenes the quene with mighty honde
Disconfyted him brought him to mischaunce
Of whom I finde none other remembraunce
Saue whan he wende to haue been moste glorious
He was outrayed by force of brennyus