Lenuoye.
THis tragedye aforne declareth here
The greate outrage of vnkindnesse
Atwene two brethren regnynge both Ifere
In {per}ce londe as ye haue herde expresse
Tyll diuision of all myscheef mas••resse
Gon entre in through fraternall hatrede
Which ageyne kinde destroyed their kinrede
The werre arose contagious for to lere
Throughoute all Perce of mortall frowardnesse
Of Cyrus deth rehersinge the manere
Howe helples he dyed in distresse
And howe the noumbre of brethren dyd them dresse
To sle their fader the story ye may rede
Causinge an ende of all their hole kinrede
Kinge artaxerses with a frowarde chere
His Iniuries and wronges to redresse
Slough his children their moders eke Ifere
Spared nat one of frowarde cursednesse
By which occasion toke a greate sekenesse
After dyed in mischeef and in drede
Causinge an ende of all his hole kinrede
Loo here a sorowe nat {per}ticulere
For through all perce ran the cursednesse
The croked fame spred both ferre and nere
Of this vengeable hasty fell woodnesse
The ayre infectinge with sclaūdrous blaknesse
To shewe the vengeaunce the contrarious mede
Of blode vnkynde borne of one kinrede
Noble princes lift vp your iyen clere
And considre by greate auisnesse
The wofull stryues the odious fell daungere
Sowne in kinredys of wilful straungenesse
Of all rancoure youre corage do redresse
P••isinge the mischeuys folowynge on in dede
Of blode vnkinde borne of one kinrede