Here Bochas maketh an exclamacion vpon the deth of Alcibiades
O Fatall sustren which span the lyues threde
So shorte a terme why dyd ye determyne
To suffre him brenne amonge the coles rede
Ye were to hasty to breke and vntwyne
His web of knighthode yt thrugh the world dyd shyne
And cast of noblesse his bemys oute so clere
Alas that euer he fyll in your daungere
Oute on Stix and on attrapos
That haue of malyce slayne so good a knight
Oute on you thre that kepe youre silf so clos
Doughter I called of the derke night
And thou le••ū that queyntest eke the light
Of alcibiades myrroure and lanterne
To speke in knighthode howe men shulde thē goūne
Ye sle the worthy and wretchis ye do spare
Torcites lyueth hector is slayne in dede
Youre funeral smokis maketh realmes nowe so bare
To race vp Cedrys their braunches may nat sprede
Ye palle the laurer ye make the firses sede
Full lytell thanke in kingdoms ye deserue
Caytifs to fostre and do the worthy sterue
Alcibiades is passed in to fate
Light of knighthode light clipsyd in the shade
The par••as susterne to sone set his date
Of his high noblesse to make the laurer fade
Lacedomonois of his deth were glade
Funerall fire his body hath diffred
For high prowesse his soule stellefied
Lenuoye
ALas this tragedye doth myn herte blede
My penne quaketh of ruth and of pyte
In my wrytynge whan that I take hede
To see the straunge feerfull diuersite
Of all worldly vnsure felicite
Howe from their sees shortly to comprehende
Frowarde fortune doth princes doun descende
Alcibiades of corage and of manhede
As is reherced in bokes ye may se
Of gentylnesse and of goodlihede
Of semelynesse of fredom of bountye
Of high prudence and magnanymyte
Was moost famous as auctours him cōmende
Yit from his sete fortune made him descende