Lenuoye
THe stormy trust of euery comonte
Their gery corages and troubled cōstaunce
In this tragedye men may beholde and se
Nowe vp nowe doun as fortune cast hir chaunce
For they of custum haue ioye and moost plesaunce
In their desires vnstedfast and vntrewe
To see eche day a chaunge of princes newe
Corolian of rome a cheef cite
Was there protectoure through his mighty puissaunce
Venquesshed their ennemyes set theym in suerte
Brought in rebellis to their obeysaunce
But they ageynwarde of wilful variaunce
Banysshed him twyes and n•• cause knewe
Saue for to se a chaunge of princes newe
The knightly nobles the magnanymyte
The police the prudent gouernaunce
Of Melciades duke of the cuntre
Where that athenys is cheef toun in substaunce
Whan he their comon ganne moost to auaunce
The more vnkindly in honoure that they grewe
Moost they were besy to chaunge him for a newe
Themystodes hauynge the souereynte
Of knightes all that barespere or launce
Durynge his tyme I take nomore on me
For comparisons doo oft tyme greate greuaunce
Sixe hundred thousande he put to vttraunce
Vnto Athenys neuer founde vntrewe
Yit they conspired his exile for a newe
What thynge may here floure in felicite
Or stonde stable by longe contynuaunce
In highe estates outher in lowe degre
Nowe flowe nowe ebbe nowe ioye nowe mischaunce
After fortune holdeth the balaunce
And specially fals feynynge and vntrue
Comons desire a chaunge of princes newe
Noble princes in youre prosperite
On sodeyne chaunges set youre remembraunce
Fresshnesse of floures of braunchis the beute
Haue ay on chaunge a tremblynge attendaunce
In trust of comons is no {per}seueraunce
As wynter and Somer been dyuers of their hewe
So be they dyuers in chaunge of princes newe