••owe Ieroboam kinge of Israell for Idolatrie ••••sobedience cam to a myscheuous ende
••Eyt these stories in bochas as I fynde
There dyd appere vnto his presence
Kinges sixe him praynge to haue mynde
Vpon their fall by vnware violence
From their estatys of roiall excellence
And tofore all I fynde that there cam
Of all israell kynge Ieroboam
Vnto myn auctoure he began to declare
His dedely compleynt with a pale face
His greate myscheuys and his euyll fare
And howe he fyll doun from his kingly place
Through gret vnhappis which did his hight enbrace
And as this story playnly hath deuised
For his offencys howe he was chastisyd
An Idolatrie he was as it was tolde
Reisyd vp auteers of very force and might
Set therupon two calueryn of pure golde
Dyd theym worship ageyn all skyll and right
Gaue euyll exaumple in the peple sight
Whan he dyd with fumys and ensence
To fals ydoles vndue reuerence
Fro the temple he made the people gone
Preestes ordeyned after his owne guise
Forsoke the tribe of leuy and aaron
And vpon Bethell his offringe gan deuise
And while he dyd vnlefull sacrifise
God that wele knewe of him the fals entent
From Ierusalem a prophete to him he sent
Which him rebuked of his mysgouernaunce
And gan the peryles to him specifie
Tolde him afore for to do vengeaunce
Of dauid kinge there shulde come one Iosie
Whiche shulde his preestes that falsly coude lye
Manly destroy and sle theym all at onys
And into asshes brenne theym flesshe and bonys
And in token of their distruccion
The prophete tolde amonge theym all
Howe his auters shulde bowedoun
And his ydoles from their stage fall
Whan that folys their goddys falsly call
Whiche haue no power to helpe in no manere
For they may neyther see / fele / nor here
After this prophete Iadan had tolde
These s••ide signes playnly to the kynge
His auter fyll on pecis many folde
And ouerturnyd bacwarde his offringe
For which the kynge furiously lokynge
Put forth his hande the story maketh mynde
Bad his men the prophete take and bynde
And as he his arme raught oute on length
Had no power it to withdrawe ageyn
Wex vnweldy / contracte / and lost his strength
And whan the kinge these tokyns hath seyn
And howe the prophete spake no worde in veyn
Greatly astonyed coude sey nomore
But praide Iadan his arme to restore
And by his praiere and mediacion
Of his arme after this vengeaunce
There was anone made testetucion
And of his peyne feleth alegaunce
For which the kynge with full greate instaunce
Requeryd him to be so gracious
That day to abide and dyne in his hous