Lo Cresus and balthasar were venquesshed by cirus and the sonne of cresus slayne at the hūting of a bore
NExt to Iohn bochas within a throwe
Writinge of princes many pytous fate
he sawe kinge cresus with other on the rowe
Lowly besechinge his fallynge to translate
And howe fortune ageyne him gan debate
And of his micheef doolful for to rede
For to descryue anone he gan procede
For as it is remembred in wrytynge
As god and kinde list for him ordeyne
Of Lyde he was gouernour and kynge
And lordship had the story can nat feyne
Of many kyngdoms more than one or tweyne
Fame in that tyme so dyd him magnyfie
That he was called floure of all chyualrye
And he was also in his tyme founde
The moost experte in werre and in bateyle
And of richesse was the moost habounde
And most exallinge in conquest to preuaile
Plente of people with roial apparaile
And with al this to his greate auauntage
Noumbre of childre tenblysshe his lynage
In the moost highest of his royal see
And all was well and no thinge stode amys
Yit ta••••••use his felicite
A dreme he had and truly that was this
Howe that his sonne which called was athis
Was take from him and by mortall outrage
Slayne sodenly in his tendre age
This woful dreme dyd him greate distresse
And put his herte in greate dispeyre
Stondynge in fere and greate heuynesse
Bycause his childe tendre yonge and faire
Which that was borne for to be his heire
Shulde causeles in such myscheef dye
So as his dreme afore dyd specifie
Of this processe to declare more
Howe cresus dreme fulfylled was in dede
From olimphus there cam a wilde bore
Moost furious and sauagyne of drede
With fomy tosshes which fast gan him spede
Downe descendynge and no where list abyde
Tyll that he cam into the londe of lyde
And gan distroye their frutes and their vynes
Where euer he cam in any maner place
Brake the nettes and the stronge lynes
Of the hunters that dyd at him enchace
But vnder supporte of the kinges grace
His sonne of whome I spake tofore
Gate him licence to hunte at this bore
His fader cresus demynge of this cas
There was no cause of drede in no manere
Though his sonne were present at the chas
With other hunters such game for to lere
But aye fortune with her double chere
Is redy euer by some fatall treyne
At such disportes some myscheef to ordeyne
For one there was which had gouernaunce
Vpon this childe to wayte and to se
Chasynge the bore to saue him fro myschaunce
From all damage and aduersite
Which many lusty folke of that cuntre
With hornes houndes and sharpe speres groūde
Sekynge the bore tyll they had him founde
And as they gan feersly the bore enchace
He that was charged to be the childes guyde
As with his spere he gan the bore manace
The hede nat entryd but forth bygan to glyde
And on the childe which that stode beside
The stroke alight and or hedyd aduerte
The speres hede rose him throught the herte