Howe kinge astryages laboured to disherite cirus But god suffred his malice nat to preuayle
AFter these kynges one folowed in the pres
And to bochas his compleynt discure
And he was called the greate as••riages
Which tolde in ordre his vncouth auenture
Lorde of Asye as bokes vs assure
And had of tresure durynge all his life
Aboue all kinges a prerogatife
Moost infortunate in all his gouernaile
Felte of fortune none aduersite
Saue an heir male no thinge dyd him fayle
For he moost glorious sat in his glorious se
Of wordly welth he lackyd no plentye
Except only as clerkes of him write
He had no son his kingdome to enherite
Which to his welth was greate discres
Lest succession fayled in his lyne
A doughter had he called mundanes
Oute of whoos wombe as bokes determyne
He drempte on a night howe he sawe a vyne
In his auision with him so it stode
Ouer all asie his braunchis spred abrode
He had also a reuelacion
Slepynge a night after his soupeere
Thoughe he nat knewe the exposicion
He thought he sawe a cristallyn ryuere
With lusty waters as any beryll clere
Out of her wombe with his stremys fresshe
The soyle of asye make tendre and nesshe
Touchinge this ryuer and this lusty vyne
To him shewyd in his auision
Within him silfe he coude nat termyne
Therof to finde no clere conclusion
Withoute some maner exposicion
To him declared by folkes in sentence
Which of such dremys had experience
To him he called his astronomers
His philophers and his dyuynours
That knewe the menynge of the nyne speers
Vmages of sterres their houses and theyr toures
And such as were expert expositours
And they were assembled euerichon
Touchinge his dreme they cordyd all in one
To tell him trouth they were nat recles
Sayde his doughter fro whom there cam a vyne
She that by name was called mundanes
Shuld haue descendynge from his lyne
Whoos noble fame through asye shulde shyne
Which shulde put through his renowne
Him by force of his armys oute of his region
This was his fate he might it nat refuse
The heuenly cours but it dyd fayle
Wherupon he sore gan to muse
Such fantasies dyd his herte assayle
Fyll in greate doubte of their dyuynayle
Thought he wolde make puru••aunce
For to withstonde goddes ordenaunce
Full harde it is to make resistence
Ageyn thinge ordeyned whan god woll that it be
And namely there where as influence
Of heuyn aboue hath shape a destyne
Some men recorde that no man may it flee
The dome of this where it holde or flytte
To astronomers all hooly I cōmytte