Lenuoye
O what astate may him selfe assure
For to conserue his life in sikernesse
What worldly ioye may here longe endure
Or where shall men fynde nowe stablenesse
Sith kynges princes from their high noblesse
Record of cadmus ben sodenly brought lowe
And from the whele of fortune ouerthrowe
Who may susteyne the pitous auenture
Of this tragedie by wrytynge to expresse
It is like vnto the chaūtplure
Begynnynge with ioye endynge in wretchydnesse
All worldly blisse is meynt with bytternesse
The sodeyn chaunge therof moy no man knowe
For who sittyth highest is sonest ouerthrowe
Was in this worlde yit neuyr creature
Rekyn vp princes for all their high noblesse
Fortune coude enclyne theym to hir lure
And theym enperissh through hir frowardnesse
Wherfore ye lordes with all your greate richesse
Be ware afore or ye daunce in the rowe
Of such as fortune hath from hir whele ouerthrowe