¶Of Grysiton that his membres cete for hungre
wHat shall I wryte of caas horryble
Of grisiton with hungre so constreyned
That his life was to him self odible
In Tessalie with indigence peynyd
And p••tously his fame was disteyned
Whan he solde his doughter in seruage
Li••••ope which was but yonge of age
••y enchaunge of god to puruey theym vytayle
Of ver••y nede he was so woo bigon
He hadde no thynge that myght his thirst auayle
Neyther staū••he his hūgre with gnawyng on a bone
Wherfore he ••••te his membres one by one
A pri••••e alas was it nat grete pyte
To se hym dye in such aduersite
We hadde also radde full many a day to fore
The greate banysshynge and {per}secucion
Of Arguiois howe kynge Gela••or
Was cruelly put from his region
And his lieges of indignacion
In his place they set one Danaus
Sōne and also heire to the god belus
The people of malyce dyd him so encombre
To encrese his sorowe and his aduersite
And fifty doughters he hadde also in noumbre
And edippus his broder also parde
Hadde fyfty sonnes the story ye may se
Atwene the which in suretye of honde
In mariage there was made a bonde
Vndre the which compassyd was treason
Couertly though they dyd it hyde
But if ye lift haue clere inspection
Of this story vpon euery syde
Rede the legende of Cupide
Which that Chancer in ordre as they stode
Compyled of wymen that were called good
Touchinge the story of kynge pandion
And of his goodly faire doughters tweyne
Howe therens false of condicion
Theym to disseyue dyd his besy peyne
They both namyd of bewte souereyne
Goodly progne and yonge philomene
Both innocentys of intent full clene
Their pitous fate in open to expresse
It were to me but a presumption
Sith that chancer dyde his besynes
In his legende as made is mencion
Their martirdome and their passion
For to reherce theym dyde his besy peyne
As cheif poete callyd of bretaigne
Of good wymen a boke he dyd wryte
The noumbre vncomplete fully of nyntene
And there the story playnly he dyd endyte
Of theseus / of prongne and philomene
Where ye may se their legende thus I mene
Do theym worship and forth their life do shewe
For a clere myrrour bycause there be but fewe
I woll passe ouer and speke of theym nomore
And vnto cadmus forth my style dresse
In my wrytynge yit it greuyth me sore
Touchynge of wymen of feith or stablenesse
Blessyd be god I fynde none excesse
And for there been so fewe as thinkyth me
The good shulde be had in more deynte
¶Lenuoye
THis tragedye berith to you witnesse
Howe saturnus by disposicion
Maliciously of his frowardnesse
Causeth in Iuno full greate infection
She of nature conueyeth the nature doun
The eyre infecte which no man may socoure
Cometh deth anone and all thinge doth deuoure