¶Howe many yeres was bitwixte Adam and Nembroth and bitwixte Nembroth and Cadmus and of other kynges
THese olde poetis with their sawes swere
Full couertly in their verse do feyne
How olde saturne was sūmetyme kynge of Crete
And of custome dyd his besy peyne
And of his goodnesse lyft to ordayne
That he shulde as of his nature
E••h••on deuoure as by his engendrure
In this mater shortly to soiorne
To vnderstonde of poetys the processe
They mene playnely at this worde saturne
Doth in it self nothynge but tyme expresse
And philosophers bere also witnesse
That as in tyme furthe euery thynge is brought
So tyme ayenwarde brīgyth euery thyng to nought
Clerkys also recorde in their writynge
Vndre supporte as I dare reherse
Howe that fyre wastyth euery thinge
And yron herde doth nesshe thynges perce
If ought abydith that they may not transuerce
Yit comith tyme and by continuaunce
And all consumith with his sherpe launce
His sharpe toth of consumpcion
In s••yll wyse doth his besy cure
For to auentissh in conclusion
All thynge that is brought forthe by nature
By longe abydynge ye may them nat asure
For olde thyngys deuouryd men may se
Ferre out of mynde as they neuir had be
Who can or may remembre in any wyse
The glorious prowesse of these prynces olde
Or the noblesse of philosophers wyse
Or of poetis their feynynge to vnfolde
Processe of yerys alas as I you tolde
Deuouryd hath their name and their noblesse
Derkyd their renoune by foryetfulnesse
Thus of their names is left no memorye
Tyme with his rasoure hath done so grete vengeaūce
Shauen awaye the honoure and the glorye
Of many noble full myghty of puissaunce
That there is lefte nowe no remembraunce
Of princes / poetys / ne philosopheres
For whan that deth nayled theym in their cofres
Cam tyme vpon and by processe of yeres
Their memory hath duskyd and their mynde
And reuolucion of the heuenly sperys
By oft turnynge their glorie hath left behynde
Thus euery thynge which subget is to kynde
Is in this lyfe withoute more auauntage
Wastyd with tyme and processe of langage
In the first tyme from adam to Noe
Prudente Listirs which list in bokys to rede
Fonde of fortune no mutabilite
Neyther of her chaunge they toke tho none hede
But from adam there rekened been in dede
Vnto Nembroth by turnynge of the heuene
A thousand yerys vii hundryd and eleuene
In which space who that considerith well
There ben no thinges writen in especiall
Digne of memorye ne speken of neuer adell
Which that been notable ne historiall
But for the tyme Nembroth had a fall
Vnto cadmus the yeres to contene
They were a thousande / iiii hundryd / and xiiii
Touchynge this Cadmus as bochas list endite
It is rehercid by rethoriens
Howe one vixoses in bokes as they wryte
Was made first a kynge of the egipciens
Whan philosophers and nigromanciens
Byganne first to abounde their renoune to auaunce
Nachor that tyme hauynge the gouernaunce
Of the ebrewes as made is mencion
After nembroth by true rehersaile
Thre hundryd yere by computacion
Foure score and xii which tyme it is no fayle
That vixoses beganne werres and greate bateyle
Of volunte ayenst straunge nacions
And to conquere cites borowes and townes
By force only withoute title of right
He wanne all egypte to encrease his nane
But for al that who list to haue a sight