This Achilles full manly of his herte
Hurte of Ector and his wounde grene
Slough ector after or he dyd aduerte
The which achilles for loue of pollicene
By compassynge or Eccuba the quene
Vndere Trety this grekis chaumpion
Was slayne of paris within troye toun
Who••s deth to auenge pirrus in his tene
Furiously with face dede and pale
Slough afterwarde the saide pollicene
And dismembryd all on pecis smale
Which for to here is a pitous tale
That a knight so vengeable was in dede
To sle a maide quakynge in hir drede
He coude for Ire on hir no mercy haue
But with his swerde moost furious and wode
Merciles vpon his faders graue
Like a tiraunt he shed hir chaste blode
The dede horrible diffaced his knighthode
That to this the sclaundre and diffame
By newe report reboundeth on his name
Po••tes saye and specially onide
Write whan grekis fro Troye shulde saile
Howe their shippis by an anker dyd ride
Of th••••r purpose which longe dyd theym faile
But in this while he makith rehersaile
Oute of the erth manacinge of chere
Of achilles an ymage dyd appere
To grekis saide with a dedely face
I felt wele myn honour and my glorie
And my noblesse full lightly forth doth pace
Vnkynde people oute of your memore
Which by me had youre conquest and victorie
Your deuire doth pollicene to take
And on my graue a sacrifise to make
With hir blode loke ye spare nought
To springe it ••ounde aboute my sepulture
Thus blode for blode with vengeaūce shalbe bought
And for my deth / the deth she must endure
And hole the maner of this auenture
And howe she died in her maidenhede
Methamorphose••s the processe ye may rede
In hasty vengeaunce set was all his ioye
With thurste vnstaunchid / troian blode to shede
He slo••gh priam the worthy kinge of troye
And into grece with him he dyd lede
Adromada the story ye may rede
Weddyd hir and after in certeyn
By him she had worthy sonnes tweyne
But in repairynge home to his cuntre
As Eolus dyd his shippes dryue
I finde he was a pirat of the se
And into Grece whan he dyd aryue
Fortune vnwarly gan ageyn him stryue
Forsoke his wife lete hir lyue alone
Toke another called hermyone
Which was that tyme in mariage
To horistes son of agamenon
And he alas of louys wilfull rage
Toke hir by force to his possession
But of auoutrye folowith this guerdon
Sodeyn deth / pouert / or shame
Open disclaundre / greate myscheef / or diffame
Eke in his tyme thus pirrus as I rede
Fyll into myscheef and greate pouerte
And with such meyne as he dyd lede
He was a rouer and robbyd on the see
And as poetes reherce ye may see
Of such robbynge by sclaundre and diffame
This worde pirate of pirrus toke the name
And as the story after doth deuise
The saide horistes gan sekerly espie
Where that pirrus dyd sacrifise
Tofore appollo that god to magnyfie
Full vnwarly horistes of enuye
Toke a sharpe swerde or pirrus coude aduert
Where that he stode and roof him to the herte
This was the fyne of pirrus in substaunce
For all his pride and greate presumpcion
Of fals auoutrye foloweth this vengeaunce
Losse of sūme membre pouert or prison
Or hatfull sclaundre by sūme occasion
Or sodeyn deth shortly in sentence
Complete in pirrus by ful clere euidence