Lenuoye
THe vnsure gladnesse the ioye transitorie
The vnstable surenesse the transmutacions
The cloudy brightnes the fals eclipsid glorye
Of erthely princes which haue possessions
Monarchies and dominacions
Their sodeyn chaunge declareth to vs all
Their pompous suger is meynt with bitter gall
This blinde goddesse in hir consistorie
With hir plesaunce medleth discencions
After triumphes / conquest and victorye
Reueth from kynges their ceptris and their crowns
Troubleth the people with fals rebellions
See these dukes which from their whele been fall
All wordly sugre is ment with sum gall
This tragedie maketh momerie
Of dukes tweyne and of their high renouns
And of their loue write a greate historie
And howe they conqueryd dyuers regions
Gouernyd cites / cuntrees / and also touns
Tyl•• fortune their prowesse dyd appalle
To shewe their sugre was meynt with sum gall
Princis princessis see howe deceptorie
Been all these worldly reuolucions
And howe fortune in her reclinatorie
With hir triacle temperith fals poysons
So maruelous been hir confeccions
Of frowardnesse she woll what so bifall
E••••r with hir sugre of custum tempre gall