Lenuoy
THis tragedye shewyth a figure
A maner of ymage and also lykenesse
Howe contrarye it is vnto nature
Blode vnto blode to shewe vnkyndnesse
This wofull storie can bere full well witnesse
All such debatis been as ye shall fynde
Hatefull to god and contrarye vnto kynde
For there is no more dredefull auenture
Than in kynrede to fynde frowardnesse
Neither no damage more {per}ilous to endure
Than in frenship whan there is straungenesse
A maner {per}tye by example I dare expresse
To se the tre debate ayen the rynde
To god were hatefull and contrarye vnto kynde
Euery beest and euery creature
Loueth his semblable of kyndly right I gesse
And whan one truth tweyn hertys assure
Vndepartyd of verrey {per}fightnesse
It were a visious froward cursydnesse
Their loue to knyt to louse or vnbynde
Hatefull to god and contrarye vnto kynde
Princes princessis doo your besy cure
From you to auoyde strif / fraude / and doublenesse
Remembre you vpon the vnhappy cure
Of these two bretherne and their wretchydnesse
And of their both malicious wilfulnesse
And howe their stryues / haue this well in mynde
To god was hatefull and contrarye vnto kynde