Howe Gisulphus was slayn and his wyf endyd mischeuously in lecherye.
NExt cam Gysulphus to bochas on the ringe
A famous duke and notable in his lif
With wepynge iyen pytously playnynge
With whom also cam rymulde his wif
Which that lyued euer in sorowe and stryf
Yit was she both of birth and of lynage
Right excellent and fayre of hir visage
Syxe chyldren had this famous quene
By Gysulphus goten in mariage
Wonder semely and goodly vnto seen
And fortunat by processe of their age
Albe their fadre felt great damage
By the werres he had in his lyuynge
With Gathamus that was of Narcys kinge
This cathamus with many stronge batayle
Is descendyd and take the way right
Of Duke Gysulphus the londes ta assayle
Togedre met in stele armyd bright
Gysulphus slayn his peple put to flight
And cathamus with stronge and mighty honde
Toke possession conquered all his londe
After whoos deth Rymulde the duches
Greatly astonyed pale of hir visage
To the castell of Forgoyll gan hir dresse
With hir knightes of stronge and fell corage
Cathamus made after his passage
Layde a syege cast him to Iupart
His lyf / his body rather than depart
Aboute the castell armyd as he stode
Lyke a prince sat knightly on his stede
Vpon the walles as rimuldus abode
Fresshly beseen in hir purple wede
And of the syege gan to take hede
Hir loke vnwarly as she cast asyde
And sawe the kynge afore the castell ryde
So lyke a prince and a manly knyght
She gan on him loke wonder narowe
The god of loue perced thrugh hir sight
Vnto hir herte merkyd with his arowe
Made the soyle so plyaunt of hir thought
That of hir castell she set almoost rightnought
And for to accomplissh the hole entencion
Of hir fals lust in any maner thynge
She is agreed by disposion
To yelde the castell in hast vnto the kynge
She for to come without more taryenge
Lyke a duke / a duchesse hir silf to present
Where as the kynge sat armed in his tent
The peple within prysoners take
Hir foure sonnes toke theym to the flight
Loue caused that she hath forsake
Hir blode hir kyn where it were wronge or right
And rymulde the space of all a night
With Cathamus had all hir delite
And euer after he had hir in despyte
And by the kynge whan she was refused
Twelue in nombre that dwellyd in his hous
Moost frowardly hir beutye hath abused
Of hir nature she was so lecherous
And to reherce it is contageous
Howe she wexe after so abhomynable
To be aqueyntyd with gromes of the stable
It were but vayn to tary on this matere
Or any longe processe for to make
Hir storye is contageous for to here
But fynally at myscheef she was take
For a spectacle fetchyd on a stake
Set vp aloft myn auctour telleth so
Dyed in distres for constraynt of hir wo