These wordes be nat take of myn auctoure
Entitled here for a remembraunce
By one Laurence which was translatour
Of this processe to commende fraunce
To preyse that londe was all his plesaunce
Seith Influence of that royall londe
Made charles so worthy of his honde
Of whoos noblesse pope vrban had Ioye
Him to encres for vertuous lyuynge
Which that tyme was duke of Angeoy
After chosen of cecile to be kynge
Of pope vrban required by wrytynge
Towarde rome that he shulde him dresse
Of kinge manfroy the tyrannye to oppresse
Ageyn the pope and holy church right
This sayde manfroye dyd great extorcion
Noble Charles as goddys owne knight
Cam with stronge hand vp to rome toun
Which in his cūmynge gaue possession
To Gyot manfort for to haue the garde
In his passage and gouerne the vauwarde
To rome with greate ordenaunce
They passed ouer the boundes of Itayle
This manly knight this charles born in fraunce
Lad with him many stronge batayle
The popes enmy manly to assayle
But all this while to stonde at diffence
This sayde Charles founde no resistence
Entringe rome to be their protectoure
Full well receyued at his first entrynge
Chose and preferred for cheef senatoure
By the pope moste glad of his cūmynge
Of Cecyle was after crowned kinge
And of Ierusalem as made is mencion
Graunted to him full possession
Which in his gynnynge bare him so wele
Entringe that londe with knightly apparaile
Of Cassyne gate first the stronge castele
At Boneament had a great batayle
With kynge manfroye whoos partye dyd assayle
To reherce shortly his auenture
Charles made on him a disconfiture
In which batayle kynge manfroye was slayn
And noble charles toke possession
Wherof romayns were full glad and fayne
Yit in Cecile there was rebellyon
But they were brought vnto subiection
Yit Corandyne recorde of all writynge
Son of Conrade claymed to be kinge
Gan make him stronge proudly toke his place
At alygate a famous olde cite
Noble charles with knightly chere and face
Fyll vpon him made him for to flee
And to set rest in the cuntre
To auoyde trouble and make all thynge certayn
Gaue Iugemente Corandyne to be slayn
Amonge kinges notable and glorious
Charles was put as made is mencyon
Lyke a prince stronge and victorious
In full pesyble and hole possession
Of Cecile and all that regyon
Ageyns whom was no disobeysaunce
Yeldyd of hole herte to his gouernaunce
By tytle also of his alyaunce
Fortune greatly dyd him magnefye
For as it is put in remembraunce
The noble princes that called was marie
Doughtre to Stephene regnynge in hungerie
Ioyned was and knyt in mariage
To charles son to encres of his lynage
This same charles by auctorite
So as him lyst to ordeyne
Was made kinge of the great cyte
Called Ierusalem of townes moost souereyne
By which tytle he bare crownes tweyne
His brothre lowys olde bokes saye
The same tyme in Egypt gan werreye
Gate all the cuntres aboute enuyron
Which that sarasyns dyd falsly occupye
Brought them ageyn to subiection
Of Ierusalem that londe to magnefye
Cartage in Affryk with all their Rygalye
And all the cuntrees beynge aforne contraire
To kynge charles becam tributayre
This while he sat highest in his glorye
Lyke phebus shynynge in his myddaye spere
With many conqueste and many great victorye
Whan his nobles shone moost bright and clere
The same tyme with a frownynge chere
Fortune gan from Charles turne hir face
And him beraft hir fauoure and hir grace