Lenuoye.
lyke as phebus in some fressh mornynge
After aurora the day doth clarefye
Falleth oft that his bright shynynge
Is derkyd with some cloudy skye
A liknesse shewyd in this tragedye
Expert in charles the story dth o well preue
Youth and age rekned truely
The fayre day men do prayse at eue
The noble fame of his fressh gynnynge
To saynt lowes he was nigh of allye
Right wise•• right manly / right vertuous of lyuinge
Callyd of knighthode floure of chyualrye
Tyll mayntenaunce of auoutrye
Cam into his courte to hurte his name and greue
His lyf his deth put in iupartye
The fayre day men do prayse at eue
Lyke desertys men haue their guerdonynge
Vertuous lyf doth princes magnefye
The contrarye to them is great hindrynge
Folke experte the trouth may nat denye
Serch oute the rewarde of cursyd lecherye
Where it is vsed the housholde may nat preue
In this matere to charles haue an iye
The fayre duy to prayse towarde eue
Noble princes all vices eschuynge
Youre high corage late reson guye
Withdrawe youre honde fro ryotous watchinge
Fle flesshly lustys and vicious companye
Oppresse no man do no tyrannye
Socoure the nedy pore folke do releue
Late men reporte the prudent policie
Of youre last age whan it draweth to eue