Here begynnethe the boke calledde Iohn bochas descriuinge the falle of princis princessis [and] other nobles tra[n]slated i[n]to englissh by Iohn ludgate mo[n]ke of the monastery of seint edmu[n]des Bury ...

Of Charles of Loreyn confoūdyd with hungre.

THis duke of loreyne as ye shall conceyue Had werre with the kynge of fraunce Callyd Hugh Capet and I apperceyue An archbusshop to do the kinge plesaunce Of hatrede made his ordynaunce Ageyn this duke awayte vpon him set That he him toke abed whan he slept

The sayde busshop gan falsly vndremyne This worthy duke by full fals treson Which as I fynde was called ancelyne And he was busshop that tyme of leon Which by fraude and fals collusion Toke this prince that was duke of loreyne And to the kynge he brought him by a treyne

By whom he was delyuered to prison To Orliaunce and with cheynes bounde What was his ende was made no mencion But in a pytte horryble and profounde Myscheef with hunger dyd him so confounde That I suppose this Duke of Loreyne Consumed was for constreynt of his peyne